“Teodor Menzel “I Bakı Türkoloji konqresi. 26 fevral-6 mart 1926-cı il” kitabı nəşr olunub.
AMEA Nəsimi adına Dilçilik institutundan bildirilib ki, nəşrin ideya rəhbəri akademik İsa Həbibbəyli, tərcüməçilər professor Nadir Məmmədli və dosent Sədaqət Cumayeva, nəşriyyat redaktoru Könül Mirzəyevadır.
Kitab orijinal nüsxədən birbaşa Azərbaycan dilinə tərcümə edilib. T.Menzelin qeydləri bir sıra mühüm məlumatları əhatə etməsi baxımından xüsusi əhəmiyyət daşıyır. Müəllif Qurultayın təşkilati prinsipləri, vahid platforma şəklində keçirilməsi, fəaliyyətin müxtəlif komissiyalar vasitəsilə əlaqələndirilməsi, eləcə də sovet dövlət idarəetmə sisteminin tərkib hissəsi olan ideoloji dil siyasətinin Qurultayın işinə təsiri ilə bağlı diqqətəlayiq müşahidələrini qələmə alıb.
Qeydlərdə Qurultayın fəaliyyəti, gündəliyi və gedişatı ilə bağlı mühüm məlumatlar öz əksini tapıb. Bir əsr əvvəl keçirilmiş Qurultayın hadisələri, xatirələri və müşahidələri elmi və tarixi baxımdan xüsusi əhəmiyyət kəsb edir. Bu baxımdan əsərin Azərbaycan dilinə tərcümə edilərək oxuculara təqdim olunması məqsədəuyğun hesab edilib. Bildirilib ki, qeydlərin nəşri türk xalqlarının ortaq tarixi yaddaşının öyrənilməsinə və bu istiqamətdə uzunmüddətli elmi əməkdaşlığın inkişafına töhfə verə bilər.