Tanınmış hüquqşünas, vəkil Lətifə Orucun “Sirli gedişlər” romanı qırğız dilində nəşr olunub. Bu günlərdə müəllif Qırğızıstana rəsmi dəvət alıb. Azərbaycan, rus, ingilis, türk, özbək, qazax və qırğız dillərində çap olunan əsər təkcə bədii mətn kimi deyil, həm də həyatın, ailə dəyərlərinin, insan xarakterinin və zamanın sosial-mənəvi mənzərəsinin bədii salnaməsi kimi diqqət çəkir.
Mədəniyyəttv.az xəbər verir ki. müəllif AZƏRTAC-ın müxbiri ilə söhbətində bildirib ki, səfər zamanı ölkənin Milli Universiteti, Milli Kitabxanası, Yazıçılar Birliyi və Bişkek Dövlət Universitetində oxucular, ziyalılar, tələbələr və ədəbiyyatsevərlərlə görüşlər keçirilib. Həmin görüşlərdə müəllifin keçdiyi yaradıcılıq yolu, əsərin mövzusu, ideya xətti və oxuculara aşıladığı həyat fəlsəfəsi barədə ətraflı danışılıb.
Onun verdiyi məlumata görə, səfər zamanı müəllif Qırğızıstan Xalq Assambleyasının sədri Almambet Matubraimov ilə görüşüb. Görüşdə Azərbaycan-Qırğızıstan mədəni əlaqələri, ədəbiyyatın xalqları yaxınlaşdıran gücü və birgə layihələr ətrafında fikir mübadiləsi aparılıb.
Səfər proqramında yaddaqalan məqamlardan biri də Bişkek şəhərində xalqımızın Ümummilli Lideri Heydər Əliyevin adını daşıyan məktəbdə keçirilən görüş olub. Məktəbin pedaqoji kollektivi Azərbaycan xalqına dərin sevgi və ehtiramlarını ifadə edib. Hüquqşünas-yazıçı ölkənin dövlət televiziyasına da dəvət olunub. Televiziya proqramında onun yaradıcılığı, “Sirli gedişlər” romanının uğuru və Azərbaycan ədəbiyyatının müasir inkişaf istiqamətləri barədə geniş söhbət aparılıb.