Azərbaycanın paytaxtı Bakı şəhərinin milli rəmzlərindən birinə çevrilən “Alov qüllələri” dünyanın ən gözəl göydələnlərinin siyahısında yer alır.

Bu sözlər İranın javankhodro.ir portalında Bakı haqqında dərc olunan məqalədə yer alıb. Qeyd olunub ki, Azərbaycanın ən hündür konstruksiyaları arasında olan “Alov qüllələri” Bakının əsas turistik məkanlarından sayılır.

Materialda qüllələrin xüsusiyyətlərinə nəzər salınıb. “Alov qüllələri” kompleksinə daxil 3 göydələn fərqli hündürlüklərdədir. Biri 182, digərləri isə 165 və 161 metr hündürlükdədir. Kompleksin ümumi ərazisi 245 min kvadratmetrdir. Hər 3 bina alov formasında inşa edilib. Onların daha bir xüsusiyyəti səmadan üçbucaq formasında görünməsidir. Binaların təyinatına gəlində isə qeyd etmək lazımdır ki, onlarda biri yaşayış üçün nəzərdə tutulub. Digərində biznes mərkəz və ofislər yerləşir. Üçüncü bina isə lüks oteldir.

Yazıda, həmçinin qeyd edilib ki, cəlbedici cəhətlərdən biri də onların işıqlandırılmasıdır. Axşam saatlarında binalar alov kimi yanır və heyrətamiz mənzərə yaranı ki bu da çox diqqət çəkicidir. Alovla yanaşı, binaların üzərində fərqli görüntülər də nümayiş olunur. Yeri gəlmişkən Bakının müxtəlif məkanları UNESKO-nun Ümumdünya İrs siyahısına daxil edilib. Bu göydələnlərin alov formasında tikilməsi Azərbaycan xalqının milli adət ənənəsi və mədəniyyəti ilə əlaqəlidir. Xalq qədim zamanlarda alova xüsusi ehtiramla yanaşıb və onu müqəddəs hesab edib. Kompleks Abşeron yarımadasının Cənub hissəsində Xəzər dənizinin sahilində yerləşir.

Materialda “Alov qüllələr”inə getmək üçün metro və avtobus marşrutları da göstərilib.