Mədəniyyət Nazirliyi tərəfindən görülən tədbirlər, həyata keçirilən layihələr müasir Azərbaycan incəsənətinin təbliği baxımından mühüm əhəmiyyət daşıyır.
Ötən il ölkəmizdə təsviri və dekorativ sənət sahəsində bir sıra işlər görülüb.
Belə ki, Gəncə şəhərindəki XIX əsr “Hüsniyyə” məscidinin interyerində Xalq rəssamı Toğrul Nərimanbəyov tərəfindən çəkilmiş divar rəsminin konservasiyası və bərpası işləri tamamlanıb.
Ötən il aprelin 12-də Muzey Mərkəzində tanınmış heykəltəraş, Əməkdar rəssam Münəvvər Rzayevanın 90 illik yubileyinə həsr olunmuş anım tədbiri keçirilib.
Mayın 19-dan 31-dək keçirilən 21-ci TÜRKSOY Rəssamlarının görüşündə ölkəmizi təmsil etmək üçün gənc və istedadlı rəssam Pərviz Ələkbərli Qırğızıstanın Oş şəhərinə göndərilib. Mayın 21-də “Hilton Baku” hotelində Azərbaycan Dövlət Rəsm Qalereyasının və "Auction Baku"nun təşkilatçılığı ilə incəsənət əsərlərinin ilk auksionu keçirilib.
Eyni zamanda, iyunun 14-dən 28-dək “Baku Crystal Hall”da Azərbaycan rəssamlarının ilk respublika satış sərgisi təşkil olunub.
Noyabrın 6-dan 9-dək tanınmış Amerika və Rusiya rəssamı, heykəltəraş Mixail Şemyakin Mədəniyyət Nazirliyinin dəvəti ilə Bakıda olub. Səfər çərçivəsində rəssam Azərbaycan Dövlət Rəssamlıq Akademiyasında ustad dərsi keçib. Həmçinin o, “YARAT” Müasir İncəsənət Məkanını, Azərbaycan Dövlət Akademik Opera və Balet Teatrını, Azərbaycan Milli Xalça Muzeyini ziyarət edib və faydalı görüşlər keçirib.
Noyabrın 7-də Mədəniyyət Nazirliyi, “Auction Baku” MMC və Azərbaycan Dövlət Rəsm Qalereyasının təşkilatçılığı ilə “Hilton Baku” hotelində incəsənət əsərlərinin növbəti auksionu təşkil olunub. Ötən il ikinci dəfə keçirilən auksion respublikada mədəniyyət və incəsənət sahəsində biznes münasibətlərini inkişaf etdirmək, alıcı və satıcılar arasında əlaqə qurmaq, art biznes sahəsində rəqabət qabiliyyətini gücləndirmək məqsədilə təşkil edilib. Mərasimdə çıxış edən Mədəniyyət naziri Əbülfəs Qarayev auksionun əhəmiyyətini yüksək qiymətləndirib.
Noyabrın 21-də Muzey Mərkəzində “Alüminium” VI Bakı Beynəlxalq Müasir İncəsənət Biennalesinin rəsmi açılış mərasimi olub. Biennale çərçivəsində “Qala” Dövlət Tarix-Etnoqrafiya Qoruğunda Mədəniyyət Nazirliyi və Azərbaycan Rəssamlar İttifaqının təşkilatçılığı ilə gürcü rəssamlarının performansı keçirilib. Azərbaycanda artıq altıncı dəfə keçirilən layihədə 17 ölkədən 40-dək rəssamın müxtəlif performans və installyasiyaları nümayiş olunub. “Qala” Dövlət Tarix-Etnoqrafiya Qoruğunda gürcüstanlı rəssam Zaira Nadirashvilli performans nümayiş etdirib. Norveçdən olan iştirakçı Eli Gladerin video və Katarzyna Podqoska Qlontinin installyasiyaları tamaşaçıların marağına səbəb olub. “Alüminium” VI Bakı Beynəlxalq Müasir İncəsənət Biennalesi noyabrın 25-dək davam edib. Layihə üzrə müxtəlif məkanlarda sərgilər, təqdimatlar təşkil olunub.
Dekabrın 16-dan 26-dək Milli İncəsənət Muzeyində Xalq rəssamı Nadir Qasımovun 90 illik, dekabrın 20-dən 27-dək isə Muzey Mərkəzində Xalq rəssamı Kamil Nəcəfzadənin 90 illik yubiley sərgiləri keçirilib.
