Yunus Əmrə İnstitutunun yaradılmasının 10 illiyi münasibətilə Avropa turnesi çərçivəsində ilk konsert Macarıstanın paytaxtı Budapeştdə olub. Tədbir TÜRKSOY təşkilatının dəstəyi və Azərbaycan, Qazaxıstan və Türkiyənin Macarıstandakı səfirliklərinin himayəsi ilə keçirilib.

“Türk dünyası melodiyaları” adlı konsert “Duna Palota” sarayında təşkil edilib.

TÜRKSOY təşkilatının baş katibi Düsen Kaseinov, Budapeşdəki Yunus Əmrə İnstitutunun direktoru Yakub Gül, Macarıstan Xarici İşlər Nazirliyinin dövlət katibinin müavini Andraş Baranyi, Azərbaycanın Macarıstandakı səfiri Vilayət Quliyev, Qazaxıstanın Macarıstandakı səfiri Canibek Abdraşov və Türkiyənin Macarıstandakı səfiri Əhmət Akif Oqtay tədbirə toplaşanlar qarşısında çıxış ediblər.

Yunus Əmrə İnstitutunun direktoru Yakub Gül AZƏRTAC-a müsahibəsində deyib ki, yaradılmasından 10 il keçən bu institut dünyanın 48 ölkəsində 58 mədəniyyət mərkəzi ilə birgə tədbirlər keçirir. Y.Gül daha sonra əlavə edib ki, institutun 10 illiyinə həsr edilmiş turun ilk konsertinin Macarıstanda keçməsi onun üçün böyük şərəfdir. Xatırladaq ki, Macarıstan yaxın vaxtlarda Türk Şurasında müşahidəçi statusu əldə edib.

TÜRKSOY təşkilatının baş katibi Düsen Kaseinov da öz fikirlərini bölüşüb. O vurğulayıb ki, TÜRKSOY ilə Macarıstan arasında əlaqələr günbəgün möhkəmlənir, Macarıstandan olan rəssamlar, alimlər və musiqiçilər mədəni mübadilə çərçivəsində türk dünyasının müxtəlif regionlarında səfərdə olurlar. O qeyd edib ki, bu fəaliyyət xalqlarımız arasında qardaşlıq əlaqələrinin möhkəmlənməsinə şərait yaradacaq.

Qazaxıstan Respublikasının müstəqilliyinin 28-ci ildönümü ərəfəsində bu ölkənin iki məşhur musiqi kollektivi – “Akjarma” folklor musiqi ansamblı və “Jorqa” xalq rəqs ansamblı “Duna Palota” konsert zalının səhnəsində öz musiqi nömrələrini ifa ediblər. Azərbaycanı təmsil edən müasir musiqi ansamblının, qırğızıstanlı ifaçı Ayqerim Muxtardinqızının, Türkiyə Cümhuriyyəti Mədəniyyət və Turizm Nazirliyinin Ankara Türk Dünyası Musiqisi Ansamblının və yenə Türkiyədən olan CopeArt ansamblının çıxışları da tamaşaçılar tərəfindən alqışlarla qarşılanıb.