Teleradio Akademiyasının rejissorluq kursları üzrə dinləyicilərinin “Dar Dalan” layihəsinin təqdimatı keçirilib.

AZTV.AZ xəbər verir ki, təqdimat mərasimində Azərbaycan Televiziyası və Radiosunun tanınmış ustadları, əməkdaşları və Akademiyanın müəllim-dinləyici heyəti iştirak ediblər.

Akademiyanın rektoru Faiq Hüsiyev bildirib ki, budəfəki tədris ili müsabiqələr semestrini xatırladır. Dinləyicilər müəllimlərlə birlikdə ardıcıl olaraq müxtəlif müsabiqələr təşəbbüsü ilə çıxış ediblər. Noyabrın 1-də Hüseyn Hüseynovun rəhbərlik etdiyi operatorluq kursunun dinləyicilərinin “Addım” foto-sərgisi təşkil edilib. Onların ardınca Əlimürsəl Hacızadənin rəhbərlik etdiyi rejissorluq kursunun dinləyiciləri qısametrajlı filmlərdən ibarət “Dar Dalan” layihəsini hazırlayıblar. Növbəti həftədə isə Akademiyanın müəllimi Sevda Ağazadənin rəhbərliyi ilə dinləyicilərin 6 cümlədən ibarət hekayə müsabiqəsinin keçirilməsi planlaşdırılır.

Sonra qrupun rəhbəri Əlimürsəl Hacızadə yetirmələrini və onların ərsəyə gətirdikləri qısametrajlı filmləri tədbir iştirakçılarına təqdim edib.

Səidə Mikayılovanın "Yağış", Xəyalə Qasımovanın "Kişi sözü", Ziyafət Kazımovanın "Bakı boyda sükut", Nərmin Xankişiyevanın "Suya qənaət edək!", Tehran Aslanovun "Flora", Məhəmməd Qulamovun "Qara qızıl", Şəlalə Camalovanın "Fəvvarələr meydanı", Zurab Salmanoğlunun "Qəpik, qəpik manat olar" qısametrajlı filmləri nümayiş olunub.

Filmlərə baxışdan sonra tanınmış teatr, kino və televiziya rejissoru, xalq artisti Ramiz Həsənoğlu, sənətşünaslıq doktoru, professor, əməkdar incəsənət xadimi İlham Rəhimli, tanınmış rejissor, əməkdar incəsənət xadimi Etibar Babayev, əməkdar jurnalist Rafiq Savalan, tanınmış operator, əməkdar mədəniyyət işçisi Eldar Məmmədov, video-montaj üzrə rejissor və kinooperator Hüseyn Hüseynov çıxış ediblər. Onlar filmlər haqqında öz fikirlərini bölüşüb və dinləyicilərə gələcək fəaliyyətlərində uğurlar arzulayıblar.