Azərbaycan Dövlət Akademik Milli Dram Teatrının 100 illik yubileyi ilə əlaqədar teatrın kollektivi oktyabrın 29-da Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad edib, məzarı önünə gül dəstələri qoyub.

Görkəmli oftalmoloq-alim, akademik Zərifə xanım Əliyevanın da xatirəsi yad edilib, məzarı üzərinə tər çiçəklər düzülüb.

Sonra Azərbaycan teatrının görkəmli nümayəndəsi Hüseyn Ərəblinskinin məzarı ziyarət olunub, qəbri üstünə gül dəstələri qoyulub.

Xalq artisti Azər Paşa Nemətov jurnalistlərə açıqlamasında bildirib ki, ulu öndər Heydər Əliyev hər zaman teatrın dostu olub: “O, hər dəfə teatrımızın premyeralarında iştirak edər, tamaşadan sonra səhnə arxasında kollektivin üzvləri ilə görüşər, tamaşanı müzakirə edərdi. O, kollektivin hamısını adı ilə tanıyardı. Heydər Əliyev teatra hər zaman qayğı ilə yanaşardı. Buna görə də Azərbaycan Dövlət Akademik Milli Dram Teatrının 100 illiyi günü Ulu Öndərin məzarını ziyarət etmək bizim üçün vacib idi. Çünki o, həmişə teatrı ziyarət edirdi, bu gün isə biz onu ziyarət etməyə gəlmişik”.

Azərbaycan Dövlət Akademik Milli Dram Teatrının 100 illiyini keçirməsinin qürurverici hal olduğunu vurğulayan Azər Paşa Nemətov bildirib ki, 1919-cu ildə kiçik dəstələrdən ibarət olan teatr trubaları birləşdirilərək ilk dövlət teatrını yaradıblar. Teatrımız bu gün də yaşayır, inkişaf edir, irəliyə doğru addımlar atır".

Sonra Şəhidlər xiyabanına gedən kollektiv ölkəmizin azadlığı və ərazi bütövlüyü uğrunda mübarizədə canlarından keçmiş qəhrəman Vətən övladlarının məzarları üzərinə gül dəstələri düzüblər.