“NUR Art House” qalereyasında “Azərbaycan xalçaçıları” İctimai Birliyinin (qurumun sədri professor Röya Tağıyevadır) dəstəyi ilə “Qarabağdan olan məcburi köçkün qadınlar üçün xalçaçılıq kurslarının təşkili” layihəsi üzrə yekun sərgi keçirilib.

2019-cu ildə keçirilmiş birinci qrant layihəsinin yekunlarına əsasən həyata keçirilən və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən maliyyələşdirilən bu layihə “Müasir dövrdə Qarabağ xalçaçılığının inkişaf potensialı” adlı uğurlu layihənin davamı olub.

Ağdam, Füzuli və Cəbrayıl rayonlarının sakinləri arasında, həmçinin Tərtər rayonundakı cəbhə xəttində aparılmış sorğu nəticəsində məlum olub ki, doğma vətənindən uzaqlarda doğulmuş gənc nəslin nümayəndələri bu etnoqrafik dəyərlər barədə çox cüzi məlumata malikdirlər. Milli mədəni irsimizin qorunub saxlanmasına xüsusi diqqət yetirildiyi bir vaxtda bu fakt təşviş doğurur.

Sərgi iştirakçıları üçün nümayiş etdirilən sənədli filmdə vurğulanır ki, Qarabağ nəinki Azərbaycanın, bütün Qafqazın mühüm iqtisadi, siyasi və mədəni mərkəzi olub. XV-XVI əsrlərdə Azərbaycan incəsənəti, o cümlədən xalçaçılıq sənəti yüksək dərəcədə inkişaf edib, lakin o dövrə aid xalçaların çoxu Avropaya ixrac edilib, orada Avropa məişətinin tərkib hissəsinə çevrilib. Avropalı rəssamların rəsm əsərində xalça təsvirləri buna əyani sübutdur. Məsələn, XV əsrdə yaşayıb yaratmış Hans Memlinqin “Məryəm Ana və körpə”, “Cavan oğlan portreti” əsərlərində Qarabağda toxunmuş “Muğan” xalçası təsvir edilir.

XVIII əsrdə əsasən Şuşada cəmləşmiş Qarabağ xalçaçılığı milli ənənələrə əsaslanırdı. Lakin hazırda Qarabağın işğal altında olması səbəbindən bu ənənələr bir qədər zəifləyir. Tarixi yurdlarından uzaq düşmüş insanlar tədricən bu ənənələri itirirlər.

Azərbaycan Rəssamlar İttifaqının və “Azərbaycan xalçaçıları” İctimai Birliyinin Rəyasət Heyətinin üzvü Eldar Hacıyev layihə barədə söhbət açaraq bildirib ki, layihənin əsas məqsədi Qarabağ mühitindən ayrı düşmüş məcburi köçkün qadınlara “Şəddə” və “Dəstərxan” adlı xovsuz xalça toxumağın Qarabağ üçün nadir sayılan və unudulmaqda olan texnologiyasını öyrətməkdir.

“Azərbaycan xalçaçıları” İctimai Birliyinin katibi Gülşən Əhmədova, kursların müəllimi Gülnarə Əliyeva və başqaları xovsuz xalçalar üzərində iş barədə məlumat veriblər.

Kursları bitirmiş məcburi köçkün qadınların həmin kurslarda mənimsədikləri bacarıqlar nümayiş etdirilib, bu qadınların toxuduğu “Şəddə” və “Dəstərxan” adlı xovsuz xalçalar Zəngilan və Füzuli muzeylərinə hədiyyə edilib.