Sant-Peterburqun nüfuzlu Mariinski Teatrının yeni səhnəsində dünya şöhrətli bəstəkarımız Fikrət Əmirovun 100 illik yubileyi münasibətilə “Min bir gecə” baletinin premyerası keçirilib.

Mariinski Teatrının Primorski səhnəsinin truppasının təqdim etdiyi “Min bi gecə” baletinin ilk nümayişi gözlənildiyi kimi böyük uğura imza atdı. Tamaşanı Primorski səhnə truppasının baş xoreoqrafı, Rusiyanın Əməkdar incəsənət xadimi, həmyerlimiz Eldar Əliyev səhnələşdirib. “Min bir gecə” baletinin dirijoru Azərbaycanın Əməkdar Artisti, Azərbaycan Dövlət Opera və Balet Teatrının baş dirijoru və musiqi rəhbəri Əyyub Quliyevdir.

Tamaşada əsas partiyaları yaponiyalı balet ustası Saki Nişida, Liliya Berejnova, Seygey Umanets və Braziliyadan olan sənətçi Gilyerme Gunino ifa edirlər.

“Min bir gecə” baleti Mariinski Teatrının yeni səhnəsində 22-23 yanvar tarixlərində də nümayiş olunacaq.

Qeyd edək ki, səhnə əsəri ilk dəfə 1979-cu ildə Bakıda nümayiş olunub. “Min bir gecə” nağılları əsasında ərsəyə gələn baletin librettosu görkəmli yazıçılar Maqsud və Rüstəm İbrahimbəyovlar tərəfindən yazılıb.