Texnoloji yeniliklər bizə ən uzaq məkanları belə yaxın edir... Dünyanın istənilən yerindən minlərlə kilometr uzaqlıqda yerləşən muzeyləri, tarixi abidələri ziyarət etmək indi daha asandır. Virtual reallıq, artırılmış gerçəklik sayəsində Parisin incisi Notr-Dam kilsəsini də gəzmək mümüknüdür, hətta yanmış abidənin restavrasiyasını izləmək imkanı da var...

Fransa paytaxtının əsas simvollarından birinə çevrilmiş Paris Notr-Dam və ya Paris Məryəm ana kilsəsinə dünyanın hər yerindən ziyarətçilər qəbul edir. Lakin 7 əsrlik yaşı olan tarixi abidənin 2019-cu ilin aprelində güclü yanğına məruz qalması bütün dünyada böyük təəssüflə qarşılanmışdı. Yanğından dərhal sonra qotik üslubda inşa olunmuş memarlıq nümunəsinin bərpasına başlanılıb. Artıq 3 ildir ki, davam edən restavrasiya işlərinin 2024-cü ildə tamamlanması planlaşdırılır. Bu müddətə qədər isə Notr-Dam kilsəsinin ehtişamına virtual reallıq vasitəsilə şahid olmaq mümükündür. Ziyarətçilərdə böyük təəssürat yaradacaq virtual səyahət xüsusi səs effektlərinin müşayiəti ilə 45 dəqiqə davam edir. Kompüter texnologiyası vasitəsilə kilsə və ətraf ərazilər da dədiqliklə təsvir edilib. Ən maraqlı məqam isə tarixi abidə, onun tikilməsi haqqında məlumat verənlər, memar Ejen Violle-leDyuk, general Şarl De Qol kimi Fransanın tarixi şəxsiyyətlərinin holoqramlarıdır. 50 nəfərdən ibarət qrupun 2 il ərzində ərsəyə gətirdiyi layihədə tarixçilər və memmarlar da iştirak edib. Notr Damın 2024-cü ildə ictimaiyyətə açılması, həm də Parisdə keçiriləcək Olimpiya Oyunları ilə əlaqədardır. UNESCO-nun ümumdünya irs siyahısında olan Notr Dam kilsəsinə virtual səyahət layihəsi tezliklə Nyu York, Roma, Moskva kimi şəhərlərdə də nümayiş olunacaq.

Xavər Zairova