Antik əşyaları böyük maraqla toplayaraq özünə zəngin kolleksiya yaradan bərbər Salman İsmayılov... Hazırda 200-300 il taixi olan müxtəlif əşyaların sərgiləndiyi muzeyi bərbərlik sənətinin tarixini əks etdirən məkan hesab etmək olar. Burada sərgilənən hər bir əşyanın öz tarixi var...

Salman İsmayılovun əsl sənəti bərbərlikdir. Sevir öz işini. Deyir ki, insanlara xidmət göstərmək, onların səliqəli gürünüşünü təmin etməkdən zövq alır. Ona müraciət edən hər bir müştərinin üzündə məmnunluq ifadəsi gördükdə bunun üçün əziyyət çəkməyə dəyər deyə düşünür. Elə antik əşyalar toplamağa başlamasının da səbəblərindən biri öz sənətinə vurğunluğu ilə bağlıdır. Bərbərliyin tarixinə olan marağı onu bu sahəyə məxsus əşyalar tapıb almağa sövq edib və nəticədə böyük bir kolleksiya sahibi olub.

Sonra bu kolleksiya ilə insanları tanış etmək qərarına gəlib. Bunun üçün ideal məkan tapan kimi istəyini reallaşdlrıb. Hazırda əşyaların nümayiş olunduğu binanı seçməsi də təsadüfi deyil. Məkanın 110 ildən çox yaşı var və bura gələnlər sözün həqiqi mənasında bərbərlik sənətinin tarixi ilə yaxından tanış ola bilirlər.

Muzeydə 300-dən çox qədimi əşyalar var. Onlardan biri Avstriya istehsalı olan 1930-cu ilin təraş bıçağı düzləşdirici alətidir. Onun işləmə mexanizmi isə tamam fərqli şəkildədir.

Salman İsmayılovun ekspozisiyasına yaşı bir əsrdən çox olan orijinal təraş bıçaqları, 1900-cu ilin fotoları, ötən əsrə aid müxtəlif ətir qabları da daxildir. Tarixi əşyaların əksəriyyəti ona atasından miras qalıb, bəzilərini isə hərraclardan əldə edib.

Muzeydə 50-ə yaxın nadir fincan nümunəsi də sərgilənir. Fincanın bir əsrdən çox yaşı var. Onu digər fincanlardan fərqləndirən əsas xüsusiyyət ondan ibarətdir ki, o iri bığlı kişilərin çay içməsi üçün nəzərdə tutulub.

Sərgilənən eksponatların əksəriyyətinin 200-ə yaxın yaşı var.

Sərgilənən güzgünün isə 150-dən çox yaşı var. Britaniyanın varlı zadəgan xanımına məxsus olub.

Hazırda bu muzey Azərbaycanda və MDB ölkələrində ilk bərbərlik muzeyidir.

Sevinc Hidayət, Zaur Dadaşov