“Xarici diplomatlar və əcnəbi jurnalistlər Qarabağda kilsələrin yerində olduğunu görəndə UNESCO-nun gəlməsi mövzusu gündəlikdən çıxarıldı”. Prezident İlham Əliyev Yanvarın 12-də yerli televiziya kanallarına müsahibəsində belə deyib. Dövlət başçısı işağldan azad olunan ərazilərdə erməni vandallığının qurbanı olan tarixi abidələrin bərpasına diqqət çəkib.

“Onlar bizi az qala vandalizmdə təqsirləndirməyə çalışırdılar, düşünürdülər ki, indi biz kilsələri dağıdacağıq. Biz ermənilərin buraya gəlməsi marşrutunu onlarla razılaşdırdıq. Onlar da, onlarla əlaqədə olan bəzi ölkələr də çox təkidlə buraya gəlmək istəyirdilər. Biz işğaldan azad edilmiş ərazilərə xarici diplomatların və əcnəbi jurnalistlərin səfərlərini təşkil edəndə, onlar bu kilsələrin və bu qəbirlərin yerində olduğunu görəndə UNESCO-nun gəlməsi mövzusu gündəlikdən çıxarıldı" - bu fikirləri Prezident İlham Əliyev yerli telekanallarla müsahibəsində bildirib.

Zaman göstərdi ki, Azərbaycan qurucu mövqedədir. Əslində dağıdıcı siyasətin müəllifi Ermənistan tərəfidir. Məhz Azərbaycana məxsus məscidlər, qəbiristanlıqlar, tarixi abidələr, şəhərlər onlar tərəfindən məhv edilib. Lakin düşmən izimizi silməyi bacarmayıb. Abidənin cəmi bir divarı, bir daşı belə kifayətdir ki, onun tarixi əhəmiyyəti, kimə məxsusluğu müəyyən edilsin. Təbii ki, dağıdılan, zərər görən bütün mədəni abidələr yenidən öz görkəminə qovuşur. Bu istiqamətdə artıq xeyli işlər görülüb.

"Şuşa şəhərində, görün, nə qədər böyük işlər görülüb. Eyni zamanda, Ağdam, Zəngilan, Hadrut, Daşaltı məscidlərinin təməli qoyulub və təmir işlərinə start verilib. Yəni, bunları sadalamaq üçün çox vaxt lazımdır, mən də çalışıram ki, hər bir layihəyə daim diqqət göstərim" - deyə prezident vurğulayıb. 

Bəli, bu bir daha sübut edir ki, Azərbaycana məxsus hər daşın, hər torpağın hər birimiz üçün böyük dəyəri var. Və bu dəyər mühafizəçisi məhz Azərbaycan dövlətidir.

Səkinə Hacıyeva, Zaur Bayramov