Sənətsevələr Belçikalı rəssam Rene Maqrittin “İşıq İmperiyası” tablosunu almaq üçün mübarizə aparacaqlar.

Özünü sehirli realist adlanadıran, yaradıcılığı ilə ən çox mübahisələrə səbəb olan belçikalı sürrealist rəssam Rene Maqrit həm də təzadların ustası idi. Sanki dünyasında gecə və gündüz, işıq və qaranlıq bir-birindən fərqlənmir, əksinə vəhdətdədir. Ümumilikdə isə məntiqə zidd görününən təsvirlər onun yaradıcılığında tapmaca rolunu oynayır, tamaşaçı isə gizli nüanslar üzərində düşünərək, həll yolu tapmalıdır. Rəssamın bu il ilk dəfə hərraca çıxarılan “İşıq İmperiyası” tablosu da elə bu səbəbdən unikal sənət əsəri hesab olunur. Yaşadığı küçəni tabloya köçürən rəssam aydın səma altında gecə ilə yanaşı, qaranlıqda işıqlanan ev təsvir edib. Sənətkarın 1961-ci ildə yaxın dostu Anna Mariya üçün çəkdiyi tablo, sonralar Maqritin ailə üzvləri tərəfindən Brüsseldəki Maqritte Muzeyinə hədiyyə edilib. Rəsmin ilkin variantı isə hazırda bir sıra nüfuzlu muzey kolleksiyalarında qorunub saxlanır. Qeyd edək ki, mütəxssislərin 60 milyon dollar məbləğində qiymətləndirdiyi sənət işi satışa çıxarılmazdan əvvəl, Los-Anceles, Honq-Konq, Nyu-York və Londondakı “Sozbis” qalereyalarında nümayişə çıxarılacaq.

Nəzrin Əzizli