Tanınmış jurnalist Səmayə Məmmədovanın “Peşəkarlığın rəsmi” kitabı çapdan çıxıb. Nəşr PR sahəsi üzrə ixtisaslaşmaq istəyən gənclər üçün nəzərdə tutulub. Müəllif öz təcrübəsinə əsaslanaraq bu sahədə mövcud problemlərin aradan qaldırılmasına nail olmağa çalışıb.

“PR mütəxəssisi olmaq istəyirsənsə, təcrübə ilə bərabər, mütləq şəkildə nəzəriyyəni də inkişaf etdirməlisən. Bəli, PR elə bir sahədir ki, orada son görünmür. PR hər an dəyişən, inkişaf edən bir dünyadır”. Bu fikirlər tanınmış jurnalist Səmayə Məmmədovanın müəllifi olduğu “Peşəkarlığın rəsmi” kitabında yer alıb. Tanınmış jurnalist 22 illik media və PR sahəsində əldə etdiyi təcrübəsini oxucularıyla bölüşür. Deyir ki, kitabı yazmaqda əsas məqsədi PR, mətbuat sahəsi və bu sahələrdə işin qurulmasını özünə peşə seçən gənc mütəxəssislərə istiqamət göstərməkdir.

Təqdimat mərasimində “Salnamə” studiyasının redaktoru, ssenarist, publisist Nadir Bədəlov, Bakı Slavyan Universitetinin professoru, Əməkdar jurnalist Şəlalə Həsənova, yazıçı-tərcüməçi Svetlana Turan “Peşəkarlığın rəsmi”ndən söz açdılar. Qeyd olundu ki, nəşrdə yer alan maraqlı faktlar PR-la bağlı nəzəri bilgilərlə yanaşı, həm də uzun illərin təcrübəsinin nəticəsidir.

Ülviyyə Heydərova, Natiq Məmmədov