Mədəniyyət Nazirliyi Yanında Mədəni İrsin Qorunması, İnkişafi və Bərpası Üzrə Dövlət Xidməti Milli Xalça Muzeyində mətbuat konfransı keçirib. Məqsəd qurumun 2021 - 2022-ci ildəki fəaliyyəti üzrə nəzərdə tutulan planlara dair media əhlini məlumatlandırmaq olub.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli il ərzində görülən işlərdən danışdı. Tarix və mədəniyyət abidələrinin qorunması, bərpası, təbliği, onların istifadəsi baxımından bir sıra layihələrin həyata keçirildiyini vurğuladı. Bu sahədə həm beynəlxalq platformalarda, həm də ölkə səviyyəsində görülən işlərin davam etdiriləcəyini media nümayəndələrinin diqqətinə çatdırdı. Azad olunmuş şəhər və rayonlarda tarix-mədəniyyət abidələrinin qorunması və bərpası ilə əlaqədar “Yol xəritəsi” sənədinin hazırlanaraq aidiyyəti üzrə təqdim olunduğunu bildirdi.
Bu abidələrdən 6-sı dünya əhəmiyyətli memarlıq, 5-i dünya əhəmiyyətli arxeoloji, 119-u ölkə əhəmiyyətli memarlıq, 121-i isə ölkə əhəmiyyətli arxeoloji tikililərdir. Bundan başqa 393-ü yerli əhəmiyyətli memarlıq, 23-ü yerli əhəmiyyətli bağ-park, monumental və xatirə, 22-si yerli əhəmiyyətli arxeoloji abidələr, 17-si isə dekorativ-tətbiqi sənət nümunələridir. Azad Cəfərli bildirdi ki, 2022-ci ilin Şuşa ili elan edilməsi ilə əlaqədar Şuşa şəhərindəki abidələrin “Bərpa təlimatı” da hazırlanıb. Xocavənd rayonunda “Azıx-Tağlar mağara düşərgələri” Dövlət Tarix-Arxeoloji Qoruğunun təsis edilməsi məsələsi geniş müzakirə edilib. Bununla bağlı müvafiq sənədlər hazırlanıb və aidiyyəti qurumlarla razılaşdırılacaq. Dövlət Xidmətinin rəisi həmçinin islahatlar çərçivəsində Prezidentin müvafiq Fərmanı əsasında regional idarələrin yaradılmasından da söz açdı. Qeyd etdi ki, bu idarələrin yaradılmasında əsas məqsəd abidələrin mühafizəsinin həyata keçirilməsini asanlaşdırmaqdır. Azad Cəfərli rəhbərlik etdiyi qurumun şəhid və qazi ailələrinin sosial qayğılarının həllinə ciddi yanaşdığını da dedi. Bildirdi ki, hazırda həmin ailələrin 23 üzvü Dövlət Xidmətinin əməkdaşları sırasına qəbul olunub. Bundan başqa Dövlət Xidməti daşınmaz tarix və mədəniyyət abidələrinin bərpası və qorunması istiqamətində bir sıra işlər görüb. 2021-ci ilin mart ayında 3 qoruq - “Çıraqqala-Şabran”, “Qədim Şəmkir Şəhəri”, və “Orta əsr Ağsu Şəhəri” Dövlət Tarix-Mədəniyyət qoruqlarının əsasnamələri təsdiq olunub. Bunun əsasında onların kadr potensialı formalaşdırılıb və əmək haqqı fondu yaradılıb. Artıq Qazax Müəllimlər Seminariyasının binasının da bərpasına başlanılıb.
Sevinc Hidayət, Zaur Dadaşov
