Rəfiq Zəka Xəndanın vəfatından 23 il ötür. O, “Ömür bitər yol bitməz”, “Heydər Baba”, “Səadət” kimi məşhur şeirləri ilə minlərlə oxucunun qəlbində əbədi iz qoyub. Poeziyamızın inkişafında əvəzedilməz xidmətləri var Rəfiq Zəka Xəndanın.

Saf sevgi süzülür misralarından… Hər sözündə, hər kəlməsində məhəbbət var şairin… Şeirlərinə bəstələnən mahnılar dillər əzbəridir… XX əsr Azərbaycan ədəbiyyatşünaslığının görkəmli nümayəndəsi Cəfər Xəndanın övladı, davamçısıdır Rəfiq Zəka… Ədəbi mühitdə nakam şair Mikayıl Müşfiqə həsr etdiyi “Çağlayan” kitabı ilə tanınmağa başladı. 30-dan çox nəşrin müəllifi oldu. Rəfiq Zəka əsərlərini heca və əruz vəznində yazırdı. Onun şeirlərindən xalq dilinə bağlılıq, axıcılıq və səlistlik, eyni zamanda, zəngin Şərq ədəbiyyatını dərindən duyduğu hiss olunur. Ayrılıq nisgili, yurd, vətən həsrəti, birlik, bütövlük arzusu, soy-kökə, türklüyə böyük məhəbbəti tərənnüm edən şair, eyni zamanda, Azərbaycan - Türkiyə ədəbi əlaqələrinin inkişafında da mühüm rol oynayıb. Altmış yaşının tamamına altı ay qalmış - 1999-cu ilin soyuq yanvar günündə gözlərini əbədi yumdu şair. Gözəl şeirləri, mahnıları ilə çoxlarının sevimlisinə çevrilən Rəfiq Zəka bu gün aramızda yoxdur. Ancaq bu “yoxdur” kəlməsi yalnız onun fiziki ölümünə aiddir, çünki əsl sənətkar üçün özünün də dediyi kimi: “Ömür bitər, yol bitməz!”

Sevinc Hidayət