Milli Məclisinin Mədəniyyət komitəsi, Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası, Beynəlxalq Akvarel Cəmiyyətinin Azərbaycan nümayəndəliyi və Xətai Sənət Mərkəzinin nəzdindəki Xətai Akvarel Qalereyasının təşkilatçılığı ilə gələn ilin yanvar ayının 23-də ölkəmizdə sulu boya sənətinin inkişafı, təbliği bu sahədə çalışan rəssamların yaradıcılığının dəstəklənməsi məqsədilə Beynəlxalq Akvarel Cəmiyyətinin 10 illik yubileyinə həsr olunmuş “Akvarel təəssüratları” adlı akvarel əsərlərindən ibarət satış sərgisi təşkil olunacaq.

Sərgidə iştirak etmək istəyən rəssamlar akvarel (sulu boya) texnikasında işlənmiş əsərlərinin keyfiyyətli fotosunu və özü haqda məlumatı (ad, soyad, əsərin adı və ölçüsü) iwsazerbaijan@gmail.com e-mail ünvanına göndərməlidirlər.

Göstərilən elektron ünvanına bir müəllif bir neçə iş göndərə bilər. Təqdim edilən əsərlər arasından sərginin təşkilatçıları tərəfindən hər müəllifin 1 və ya 2 əsəri sərgidə nümayiş olunmaq üçün seçiləcək.

Seçim "IWS Azerbaijan"ın bədii şurası tərəfindən həyata keçiriləcək. İştirak etmək istəyənlər dekabrın 30-dək müraciət edə bilərlər. Seçiləcək əsərlərdən ibarət sərgi Xətai Sənət Mərkəzində təşkil olunacaq.

Sərginin iştirakçılarına hədiyyələr və sertifikatlar təqdim ediləcək.