Beynəlxalq Muğam Mərkəzində “Rioda bir gecə” adlı konsert proqramı təqdim edilib.

Konsert proqramı Beynəlxalq Muğam Mərkəzinin dəstəyi ilə Mədəniyyət Nazirliyi və Braziliyanın ölkəmizdəki səfirliyinin təşkilatçılığı ilə reallaşıb.

Konsertdən əvvəl Mədəniyyət Nazirliyinin İncəsənət və qeyri-maddi mədəni irs şöbəsinin müdiri Fərəh Acalova çıxış edərək bildirib ki, Braziliya və Azərbaycan uzaq məsafələrdə yerləşsələr də, hər iki ölkənin mədəniyyətləri arasında oxşarlıqlar var. Həm Azərbaycanın, həm də Braziliyanın dərin və tarixə köklənən musiqisi var.

Braziliyanın Azərbaycandakı səfiri Manuel Monteneqro konsertin təşkilatçılarına minnətdarlığını bildirərək deyib ki, bu gün iki ölkənin musiqiçilərinin bir arada çıxışını izləyərək bir daha musiqinin dilinin olmadığına, sənətin millətləri birləşdirdiyinə şahid olacayıq. İncəsənət fərqli mədəniyyətlərin dialoqunu yaradır. Musiqiçilər bu dialoqun ən gözəl nümunələrini təqdim edir.

Daha sonra konsert proqramı təqdim edilib.

Claudio Frankonun prodüserliyi ilə saksafon ifaçısı Edqar Duvivier və gitara ifaçısı Dami Andres Latın Amerika ritmləri vasitəsilə zaman və məkandan səyahət edərək ən yeni, orijinal kompozisiyalarla çıxış ediblər. Gecənin xüsusi qonağı Əməkdar artist, tarzən Sahib Paşazadə, ifaçılar Diana Hacıyeva, Ruslan Hüseynov, Nicat Məmmədov, Əli Nəsib braziliyalı musiqiçilərlə fərqli janrları əhatə edən kompozisiyalar təqdim ediblər. Musiqi fərqli aksentlərə malik olsa da, “universal ton” adlanan musiqi sədası dünyada bütün ürəkləri fəthetmə qabiliyyətinə malikdir. Konsert proqramı bu missiyanı tam olaraq tamamlaya bilib.