Abdulla Şaiq adına Azərbaycan Dövlət Kukla Teatrının baş rəssamı İqbal Əliyev beynəlxalq teatr forumunda iştirak edir.

Teatrın mətbuat xidmətindən bildirilib ki, Mədəniyyət Nazirliyinin dəstəyi, Azərbaycan Teatr Xadimləri İttifaqının təşəbbüsü ilə tədbirə qatılan İqbal Əliyev forum çərçivəsində müxtəlif proqramlarda, sərgilərdə iştirak edir, rəssamı olduğu tamaşaların eskiz və kuklalarını nümayiş etdirir, spesifik sahə ilə bağlı təcrübə mübadiləsində, sərgidə təmsilçisi olduğu teatrın fəaliyyəti barədə ətraflı bilgilər verir. O, eyni zamanda, forum çərçivəsində mühazirələrə, ustad dərslərinə də qatılır və komanda halında təşkil edilən maarifləndirici proqramlarda öz təcrübəsini dünyanın müxtəlif ölkələrindən olan həmkarları ilə bölüşür. Onu da qeyd edək ki, teatrın istedadlı baş rəssamı forum iştirakçıları olan rəssamlarla birgə təklif olunan tamaşalara eskizlər də hazırlayacaq.

Xatırladaq ki, Özbəkistanın Daşkənd şəhərində keçirilən “MDB, Baltikyanı ölkələr və Gürcüstanın IV Gənclər Teatr Forumu” dekabrın 7-dək davam edəcək.