Mövcud şərait, dünyanı cənginə alan koronavirus infeksiyasının yaratdığı məhdudiyyətlər teatr zallarını boş, sənət adamlarını işindən məhrum edib. Yeni mövsümdə isə səhnə əsərləri, maraqlı layihələri olan sənət məbədləri hələlik gözləmə mövqeyindədirlər.

Dünyanın ümumbəşəri bəlaya qalib gəlməyə çalışdığı bir vaxtda uzun müddətdir gözləmə mövqeyində olan teatrlar qapılarını sənətsevərlərin üzünə açacağı günü gözləyir. Alqışlardan uzaq qalan sənət adamları ilə yanaşı, vətandaşlar da asudə vaxtlarını keçirdikləri məkanlara, sevimli aktyor və yaradıcı heyətə qovuşmaq ümidindədir.

Operativ qərargahın qaydalarına riayət edərək, fəaliyyətini tezliklə bərpa etmək istəyən sənət məkanlardan biri də Gənc Tamaşaçılar Teatrıdır. Sevilən səhnə əsərlərimizin unudulmaması üçün repertuarını virtual formada təqdim edən teatr heyəti yeni layihələri ilə mövsümə tam hazırdır.

“Teatrımız pandemiya mövzusunda pyes müsabiqəsi elan etmişdi. Onların içərisindən Pərviz Seyidlinin “Mələk” pyesi seçildi. Gözləyirik ki, bu bu pyesin məşqlərinə başlanılsın. Biz həmçinin 44 günlük vətən müharibəsiylə də bağlı qalib pyesi də səhnəyə qoymağı planlaşdırırıq Biz yalnız bu cavabı, bu qərarı gözləyirik ki, layihələrimizi həyata keçirdək. Onların içərisində nümunə gətirə bilərəm “Bəbə” səhnəsini... Azərbaycanda ilk dəfə körpə uşaqlar üçün teatr taçmaşaları qurulacaq. Biz dünya təcrübəsini öyrəndik. Hazırda teatrımız bu səhnənin fəaliyyətə başlaması üçün hazırdır”, deyə Azərbaycan Dövlət Gənc Tamaşaçılar Teatrının mətbuat xidmətinin rəhbəri Pərvin Nurəliyeva fikir bildirib.

Teatrın yaradıcı heyəti rəngarəng tamaşalarla yanaşı, ölkəmizdə  ilk dəfə nümayiş olunacaq səhnə əsərlərini də təqdim etməyi planlaşdırır. 

Pandemiya dövründə fiziki olaraq xəstəlikdən qorunmamız üçün vaksinlərə ehtiyac duyuruqsa , mənəvi sağlamlığımız üçün incəsənətə ehtiyacımız var. Ruhumuzu təmizləyən sənət məbədlərinin - teatrların açılması ümidi ilə”