Ənənəvi Bakı Caz Festivalı yenidən musiqisevərlərin görüşünə gəlir. Ötən il pandemiya səbəbindən təxirə salınan festival bu dəfə fərqli formatda keçiriləcək.

Bakı Caz Festivalı bu il fərqli formatda təqdim olunacaq. Adətən müxtəlif konsert salonlarında təşkil edilən caz gecələri bu dəfə məhdud sayda tamaşaçının iştirakı ilə həyata keçiriləcək. Festivalın direktoru, “Jazz dünyası” jurnalının baş redaktoru Leyla Əfəndiyeva qeyd edib ki, bu il festival çərçivəsində 18 konsert, master-klasslar, seminar, caz filmləri günləri, eləcə də, yenilik olaraq, caz tematikası ilə bağlı “Fashion show” təqdim olunacaq. Builki festivalda 8 ölkədən musiqiçilər iştirak edəcək. Bunların arasında İsrail, Rusiya, Hollandiya, Lüksenburq, Gürcüstan, Türkiyə musiqiçiləri də var. Və əlbəttə ki, azərbaycanlı caz ustaları - İsfar Sarabski, Rain Sultanov, Şahin Növrəsli və başqaları öz ifaları ilə festivala rəng qatacaqlar.

Leyla Əfəndiyeva əlavə edib ki, festival bu il daha kiçik, klub formatında keçiriləcək. Pandemiya ilə əlaqədar Covid pasportunu təqdim etmək mütləqdir. Hər il olduğu kimi, bu il də gənc caz ifaçılarının müsabiqəsi keçiriləcək. Bu isə bizim üçün çox vacibdir, çünki hər il bizim festivalda yeni ulduzlar, yeni adlar çıxır.

Builki müsabiqədə Bakının müxtəlif musiqi məktəblərində təhsil alan 15 gənc ifaçı münsiflər heyəti qarşısında caz kompozisiyaları ilə çıxış edəcək. Qeyd edək ki, Bakı Caz Festivalı sentyabrın 10-dan 19-dək davam edəcək.