“Mədəniyyət” kanalında fərqli formatda yeni layihəyə start verilir. Ev heyvanı, xüsusən it saxlayan, yaxud saxlamaq istəyən şəxslərin maariflənməsi üçün hazırlanmış veriliş “Orxan & Cerry” adlanır. Belə ki, bəzi it saxlayan insanlar onlarla düzgün rəftar etmədiklərinə görə itlərdə psixoloji problemlər yaranır.

Problemlər, əsasən, aqressiya, qorxu, sözə baxmamaq, evdən qaçma, hətta sahibini qapma kimi hallarla müşahidə olunur. Bu problemlər daha çox öz evindən digər evə köçən, sahibini dəyişən, küçədən tapılan itlərdə özünü göstərir. Verilişdə sadiq dostlarımızın əhliləşdirilməsi, sakitləşdirilməsi ilə yanaşı, it saxlayan və ya saxlamağı planlaşdıran tamaşaçılar da maarifləndiriləcək. Həmin şəxslərə itlərlə günə necə başlamalı, itlərin cinsinə görə onlarla necə rəftar etməli olduğu aşılanacaq. Veriliş hər həftənin şənbə günü saat 11:30-da “Mədəniyyət” kanalında yayımlanacaq.