Ötən gün “Mədəniyyət” kanalında Çin təqvimi ilə “Bahar bayramı” qala-konserti nümayiş olunub. Konsert böyük tamaşaçı marağına səbəb olub.

Yaz festivalının ən əlamətdar hadisələrindən biri Çin Mərkəzi Televiziyasının (CCTV) Yeni il axşamı təşkil etdiyi qala-konsertdir. 1983-cü ildən bəri təşkil olunan konsertdə tanınmış incəsənət ustaları və xaricdən dəvət olunan qonaqlar çıxış edirlər. Ötənilki qala-konserti televiziya və internet vasitəsilə onlarla ölkədə 1 milyarddan çox tamaşaçı izləyib.
CCTV-nin qala-konserti tamaşaçı sayına görə “Ginnesin rekordlar kitabı”na düşüb.
Keçənilki konsertdə Azərbaycan Dövlət Rəqs Ansamblının 21 nəfərlik heyəti “Qaytağı” rəqsini ifa edib.
Qeyd edək ki, çinlilərin Yeni ili 21 yanvar-21 fevral aralığına təsadüf edir. Bu il fevralın 12-də Çin təqvimi ilə 4719-cu il başlayıb. Çin zodiakına görə, bu il öküz ilidir.