Bu gün Novruz çərşənbələrindən ikincisi - Od çərşənbəsidir. Od çərşənbəsinə xalq arasında üskü (tonqal) axşamı da deyənlər var. Od çərşənbəsi qədim insanların Günəşə, oda olan sitayişindən irəli gəlir və müqəddəslik, paklıq kimi rəmzi məna daşıyır.

İnanca görə xeyirlə şərin, işıqla zülmətin mübarizəsində məhz Od, İşıq, Günəş - xeyir qalib gəlir. Adət-ənənəyə görə, bugünkü gündə insanlar tonqal qalayıb, alovun üzərindən tullanmaqla üzərlərində olan bütün ağırlığı və azar-bezarları odda yandırırlar. Eyni zamanda, Novruzun hər çərşənbəsində al-əlvan bəzədilmiş xonçalarda ailənin sayı qədər şam yandırılır. Bu, əsasən, il boyu yığılan ağırlığın, qara qüvvələrin məhv olması, təmizlənməsi kimi xarakterizə olunur.
Milli-mənəvi irsimiz olan bu inancları, adətləri əsas tutaraq bu gün Cəfər Cabbarlı adına Azərbaycan Dövlət Teatr Muzeyində dekor şamının hazırlanmasına həsr olunmuş növbəti ustad dərsi keçirildi. Muzeyə dəvət olunan qonaqlar ilk öncə muzeyin ekspozisiyası ilə tanış oldular. Muzeyin əməkdaşı Suğra Ələkbərli bu ustad dərsinin mahiyyətilə bağlı geniş məruzə ilə çıxış edərək onlara şamın yalnız adət və ənənəmizlə deyil, teatr sənəti ilə də olan bağlılığından danışdı, şərq teatrının kökündə şamın vacib elementlərdən biri olduğunu izah etdi. Sonra gənclər muzey əməkdaşları ilə birgə ustad dərslərində iştirak edərək Novruz xonçası üçün öz zövqlərinə uyğun dekor şamlar hazırladılar.
COVID-19 pandemiyası ilə əlaqədar ustad dərsi məhdud sayda auditoriya ilə təşkil olundu və həmçinin sosial məsafə, sanitar-gigiyenik qaydalarına əməl edildi.

Fotolar Rüstəm İsmayılovundur