Milan dəb həftəsi məşhur brendin qeyri-adi nümayişi ilə yekunlaşıb. Disko atmosferində, ritmik musiqi fonunda podiuma modellərlə bərabər robotlar da çıxıb.

Parlaq rənglər, gözqamaşdıran qızıl və gümüş bluzlar Dolce Gabbana brendinin nümayişinə əsl şou ab-havası qatıb. Rəsmi sayt və sosial media hesabları ilə yayımlanan təqdimat videosunda dizaynerlərin 135 işi sərgilənib. Onların içində 90-cı illəri xatırladan  böyük çiyinli jaketlər, eləcə də futuristik görüntü yaradan plastik plaşlar, mini libaslar da olub. Pandemiya da yaddan çıxmayıb, yeni kolleksiyada virusla mübarizə aparan tibb işçilərinin geyimlərinə bənzərlik də diqqəti cəlb edib. Boyalı saçlar, zinət əşyaları, eynəklər, çantalar və əlcəklər yaradıcı dizaynerlərin vizit kartına çevrilib. Modellərlə podiuma çıxan robotları isə  İtaliya Texnologiya Universiteti hazırlayıb.