Fredirik Şopen... Fortepiano üçün çoxsaylı qiymətli əsərlərin müəllifi... O, yalnız Polşanın deyil, dünyanın mənəvi sərvətlərindən sayılır. 1 mart görkəmli bəstəkarın doğum günüdür.

Hələ kiçik yaşlarından musiqiyə bağlanan Fredirik Şopen fortepianoda ifa etməyi ilk anasından öyrənir. Çox keçmir ki, onun musiqiyə olan sevgisindən yalnız doğmaları deyil, ətrafdakılar da xəbər tutur. 5 yaşında konsertdə ifa edən Şopen, 7 yaşında olarkən o dövrün məşhur Polşa pianoçusu Voyçex Jivnıyın sinfinə daxil olur. 5 ildən sonra Fredirik əsl virtuoz pianoçuya çevrilir. Uğurla Ali Musiqi məktəbini bitirən Şopen dinləyicilər qarşısında ifa etməyə başlayır.

Gənc pianoçu-bəstəkar Avropada məşhurlaşırdı. O, Almaniyada çıxış edərkən Varşavada baş verən inqilabdan xəbər tutur və beləcə bəstəkar Parisə - o dövrün mədəniyyət paytaxtına köçmək qərarına gəlir. Şopen 1830-cu ilin noyabrın 5-də Vətənini birdəfəlik tərk edir ki, bu da ona iztirablar yaşadır. Polşa folkloru, rəqsləri, nəğmələri ilə mənəvi qida alan bəstəkar əsərlərinə yalnız iztirablarını deyil, həm də vətəninin ruhunu qatırdı.

Frederik Şopen 1848-ci ildə yazıçı Jorj Sanddan ayrılandan sonra cəmi bir il yaşayır. Şopeni vəsiyyətinə görə, Parisdəki Per-Laşez qəbristanlığında - musiqiçi Luici Kerubininin və italyan bəstəkarı Vinçenço Bellininin yanında dəfn edirlər, ürəyini isə Varşavaya - Müqəssəd Xaç kilsəsinə göndərirlər. Fredirik Şopenin ürəyi yüz ildən çoxdur ki, kilsə divarlarında döyünsə də, ruhu onu sevənlərin hələ də qəlbindədir.

Ülviyyə Heydərova