Xocalı həqiqətlərinin dünyaya çatdırılması, beynəlxalq aləmdə yayılması, eləcə də, bu soyqırımına obyektiv qiymət verilməsi istiqamətində davamlı olaraq addımlar atılır və müxtəlif ölkələrdə bununla bağlı tədbirlər həyata keçirilir. Belə ki, Azərbaycanın Los-Ancelesdəki Baş Konsulluğunun təşəbbüsü ilə Xocalı faciəsi haqqında  ingilis dilində film çəkilib. Həmçinin soyqırım qurbanlarının xatirəsinə həsr olunan musiqi əsərinin premyerası təşkil edilib. 

Azərbaycanın Los Ancelesdəki Baş Konsulluğu Xocalı soyqırımı dəhşətlərindən bəhs edən qısa film hazırlayıb. Filmdə Xocalıda törədilən vəhşiliklər barədə məlumat verilir.  Videomaterialda  Ermənistanın keçmiş prezidenti Serj Sarqsyanın Xocalı qətliamını etiraf edən müsahibəsindən sitat gətirilir. Həmin faciəni törədənlərdən biri, Kaliforniyadan olan erməni terrorçu Monte Melkonyanın qardaşının yazdığı kitaba da istinad edilərək, erməni cəlladlarının qəddar əməlləri təqdim olunur. Filmdə 2020-ci ildə Azərbaycanın öz ərazi bütövlüyünü bərpa etdiyi vurğulanır. Xocalıda olduğu kimi Vətən Müharibəsi dövründə də düşmənin dinc sakinləri hədəf aldığı və nəticədə uşaqlar da daxil olmaqla çox sayda mülki azərbaycanlının qətlə yetirildiyi və yaralandığı diqqətə çatdırılır. İngilis dilində təqdim olunan film  alman, alban, ispan, çin, fars, türk və digər dillərə də tərcümə edilib. Həmçinin, Kaliforniyada yaşayan tanınmış kamança ustası İmamyar Həsənovun Xocalı soyqırımı qurbanlarının xatirəsinə həsr olunan musiqi əsərinin premyerası keçirilib. Musiqi əsərinin əvvəlində insanlığa qarşı törədilən faciə haqda məlumat verilir. Videoda, eyni zamanda,  soyqırımı zamanı vəhşicəsinə qətlə yetirilən azərbaycanlıların bəzilərinin şəkilləri nümayiş etdirilir.