Səmavi dinlərin və fərqli mədəniyyətlərin izlərini özündə daşıyan əfsanəvi Qüds şəhəri... Hər daşında neçə min illik tarix yatan qədim Yerusəlimin əsas məkanlarından biri də “Qərb divarı”dır. Əsrlərdir milyonlarla insanın müqəddəs ibadətgahına çevrilən divarın daşları indi onlardan kömək istəyir...

İsrailin paytaxtında yerəşən “Qərb Divarı” həm də “Göz yaşı divarı” kimi tanınır. İki minillik tarixin şahidi olan divar daşları yəhudilərin müqəddəs məkanıdır. Süleyman Peyğəmbərin sarayından yalnız bu divarların qaldığına inanan yəhudilər onun qarşısında xüsusi ibadətlərini yerinə yetirir və günahları üçün göz yaşı tökürlər. Qüdsün  “Göz yaşı divarı” yerlilərlə yanaşı, dünyanın müxtəlif yerlərindən milyonlarla insanın dua etmək üçün gəldiyi müqəddəs məkandır. Yerinə yetəcəyi niyyəti ilə istəklərini kağız parçalarına yazıb daşların arasına qoyanlar da var. Qədim Yerusəlimdə uzun illərdir açıq havada yerinə yetirilən bu ibadət təbii olaraq, daşların müəyyən qədər zərər görməsinə səbəb olub. Buna görə də İsrailin rəsmi qurumları divarın təmir-bərpa işlərini həyata keçirməyə başalayıb. Daşınan liftlər və kranlar vasitəsilə divarın üz hissəsi restavrasiya olunur, eləcə də xüsusi şpritslərlə daşlardakı  deşiklər və çatlar əhəng tərkibli məhlullarla doldurulur. Mütəxəssislərə görə, divarın tədricən aşınması həm də iqlim şəraitinin nəticəsidir. Belə ki, daşların arasında bitki köklərinə də rast gəlmək olur ki, bunlar da divarın möhkəmliyinə xələl gətirir. Buna görə də “açıq havada sinaqoq” adlandırılan müqəddəs divarın təmir-restavrasiya işi ləngidilmədən həyata keçirilməlidir.

Xavər Zairova