Sənət fədaisi olan Xalq artisti Azərbaycan aktyorluq məktəbinin istedadlı nümayəndəsi Muxtar Avşarov...  Milli kino və teatr sənətinin inkişafında özünəməxsus xidmətləri olan sənətkarın bu gün anadan olmasından 107 il ötür...

Adı çəkiləndə gözlərimiz qarşısında sevə-sevə seyr etdiyimiz onlarla tamaşa və kinodan maraqlı epizodlar canlanır. Müsbət və ya mənfi surətlərdən asılı olmayaraq, obrazlarını peşəkarca yaratması Muxtar Avşarovu tamaşaçılara sevdirən cəhət olub. Azərbaycan realist aktyor sənətinin görkəmli nümayəndəsi  Muxtar Avşarov 1914-cü ildə dünyaya göz açıb. 4 yaşından qaçqınlıq yaşayan Muxtarın ailəsi əvvəlcə Türkiyədə sonra isə Gəncədə məskunlaşıb. Gəncə Dövlət Dram Teatırında çalışdığı 30 il ərzində 100-ə yaxın obraz yaradan Muxtar Avşarov 1968-ci ildə Dövlət Akademik Milli Dram Teatrına dəvət edilir. 90-cı illərin sonlarına qədər sözügedən mədəniyyət ocağında çalışan sənətkar Bakı Bələdiyyə Teatırının səhnəsində də yaddaqalan obrazlar yaradır. Ömrünün 65 ilini peşəkar səhnəyə həsr edən Muxtar Avşarov “Axrıncı aşırım”, “Dəli Kür”, “Kişi sözü”, “Tütək səsi”, “Gün keçdi” və digər filmlərdə “Ölülər”, “Nəsrəddin şah”, “Yaşar”, “Almaz”, “1905-ci ildə”  və bir çox tamaşalarda maraqlı rəngarəng obrazlar qalereyası yaradıb.

Azərbaycan teatrı və kinosu yaşadıqca Muxtar Avşarovun obrazları onun ömrünün davamı olacaq.

Mahmud Yaqub