Dünyada hökm sürən pandemiya şəraiti muzeylərin fəaliyyətinə də təsirsiz ötüşmür. Nəticədə, mədəniyyət ocaqlarının əksəriyyəti onlayn fəaliyyət göstərir.  Belə muzeylərdən biri də minlərlə orijinal, tarixi əsərlərin sərgiləndiyi Qazaxıstan Milli  Muzeyidir...

Qazaxıstan Milli Muzeyi  virtual nümayiş olunan 200 minə yaxın tarixi eksponatıyla da tamaşaçıların marağını cəlb edib. Muzey digərlərindən Yesik kurqanında inşaat işləri zamanı  tapılan  2500 illik “Qızıl Paltarlı Adam”ın sərgiləndiyi yeganə məkan olması ilə fərqlənir. Paytaxt Nur-Sultanda yerləşən muzeydə “Qızıl Paltarlı  Adam”  dan başqa, ölkənin müxtəlif bölgələrindən tapılmış əşyalar, dini-mifoloji fiqurlar, zinət əşyaları, eləcə də,  gözqamaşdıran kostyumlar nümayiş olunur. Bu isə Qazaxıstanın tarixi, incəsənəti  və  məişəti ilə yanaşı,  bütün türk dünyasının da yüksək mədəniyyətindən xəbər verir. Pandemiya tədbirləri çərçivəsində sənətsevərləri  virtual qarşılayan muzeyin internet portalı türk dili də daxil olmaqla, 8 dildə xidmət göstərir. Muzey rəhbərliyindən  bildirilən məlumata görə, COVID-19 virusu səbəbindən uzun müddət fəaliyyət göstərə bilməyən mədəniyyət ocağının ziyarətçi sayında azalma müşahidə edilsə də, böyük maraqla qarşılanan onlayn ekskursiyaya təxminən 140 000 tamaşaçı qoşulub.