Atası hüquqşünas, anası isə evdar qadın olub. Ailəsi aktrisa olmasına razı deyildi, lakin  o, yenə də  arzusundan imtina etməyib. 

Tamaşaçılar onu daha çox “Arşın mal alan” filmindən Asya obrazından tanıyır. Yüksək sənət zövqü ilə yaradılmış bir obraz da sənət möhürünə çevrilə, onu əbədi olaraq yaddaşlarda saxlaya bilər. Xuraman Hacıyevanın gözəl siması və istedadlı ifasına görə rejissorlar əksər tamaşalarda baş rolları ona verirdilər. O da bütün etimadları layiqincə doğruldurdu. Erkən çağlardan teatra maraq göstərən Xuraman Hacıyeva, hələ şagird ikən məktəbin dram dərnəyinə yazılır. 1964-cü ildə Xuraman Azərbaycan Dövlət Teatr İnstitutunun aktyorluq fakültəsinə qəbul olunur. Lakin müxtəlif flm və tamaşalarda iştirakı dərsə davamiyyətini zəifləməsinə səbəb olur. Universitetdən xaric edilməsinə baxmayaraq səhnə, sənət mübarizəsini davam etdirərək Gəncə Dövlət Dram Teatrına müraciət edir. Müxtəlif tamaşalarda baş rollarda oynayır.

Xuraman Hacıyeva Gənc Tamaşaçılar Teatrının səhnəsində yaratdığı müxtəlif səhnə obrazları ilə tamaşaçıların qəlbinə yol tapıb. Təəssüf ki, aktrisanın səhnədə yaratdığı maraqlı və diqqətçəkən rolların hamısının lent yazısı qalmayıb. O, “Bakıda külək əsir”, “Gənclik macərası,” “Gilas ağacı”, “Ömrün səhifələri”  və s. kimi filmlərdə də  müxtəlif obrazları canlandırıb.

O, 2005-ci il fevralın 15-də  59 yaşında  vəfat edib.  İstər filmlərdə, istər tamaşalarında layiqincə fəaliyyətinə görə əməkdar artist və xalq artisti fəxri adlarına layiq görülüb. 

Mahmud Yaqub