Canlandırdığı obrazlarla milli kino tarixində əvəzsiz xidmətləri olan Möhsün Sənani... Bu gün Xalq artistinin ölümündən 40 il ötür.

Həyatının 50 ilini Azərbyacan teatr sənətinə həsr edən, adı çəkiləndə hər kəsin üzündə sevinc və təbəssüm yaradan xalq artisti Möhsün Sənani... Sənətkarın yaradıcılıq qalereyası zənginliyi və mürəkkəbliyi ilə diqqət çəkir. Səhnəmizin görkəmli aktyorlarından olan Möhsün Sənanini xalqa sevdirən onun bənzərsiz sənətkarlığı, fitri istedadı, gənc nəslə daim qayğı ilə yanaşması olub. Sənani təxəllüsü ilə qəlblərdə taxt-tac quran Mövsün Cəfərov gənc yaşlarından teatr səhnəsinə can atır. Belə ki, müxtəlif dərnəklərə qoşulan Möhsün 1915-ci ildə Tiflis truppasına cəlb edilir. Gənc olmasına baxmayaraq, qısa zaman kəsiyində “Arşın mal alan”, “Məşədi İbad”, “Nadir şah”, “Otello” kimi əsərlərdə unudulmaz obrazlar yaradır. 1920-ci ilə kimi Tiflis truppasında çalışan Möhsün Sənani 1921-ci ildə Bakının teatr səhnələrində parlamağa başlayır. O, nəinki teatrda, kino sənətində də təkrarolunmaz rollar ifa edir. “Səbuhi”,  “O olmasın, bu olsun”, “Sehrli xalat” və bir çox əsərlərdə yaddaşlara həkk olunan obrazlar yaradır. Geniş yaradıcılıq imkanlarına malik aktyor zəngin səhnə təcrübəsini, yaradıcılıq xüsusiyyətlərini irs qoyub. 1981-ci il fevralın 11-də vəfat edən Möhsün Sənani 50 il ərzində səhnədən ayrılmadığı kimi, milli kino və teatr tariximizdə də əbədi yaşayacaq...

Mahmud Yaqub