Bu gün görkəmli  Azərbaycan teatr və kino aktyoru, əməkdar artist Əsgər Məmmədoğlunun doğum günüdür. Epizodik rolların mahir ifaçısı olan sənətkarın bir-birindən maraqlı və  rəngarəng  obrazları gələcək nəsillərə böyük örnəkdir.

Pirotexnik Ələsgər, doğum evində gözləyən, nar satan oğlan, aeroportdakı adam, Kərbəlayi Zeynal, Xalid kimi obrazlar çələngi milli teatr və kino salnaməsinin parlaq nümayəndələrindən biri  Əsgər Məmmədoğlu yaradıcılığının əvəzsiz məhsuludur. 1975-ci ildə Azərbaycan Dövlət İncəsənət İnstitutunun dram və kino aktyorluğu fakültəsini bitirən Əsgər Məmmədoğlu 1977-ci ildə Akademik Milli Dram Teatrının artist heyətinə qəbul edilib. Qısa zamanda teatrın yaradıcılıq ab-havasını mənimsəyən aktyor sənət məbədində "Mirzə Şəfi”, "Sizi deyib gəlmişəm", "Maqbet", “Bizim qəribə taleyimiz", “Özümüzü kəsən qılınc", "Aydın" kimi səhnə əsərlərində yeni rolları məharətlə ifa edir və tamaşaçıların, eləcə də sənət yoldaşlarının dərin rəğbətini qazanır.  Baş rolları ifa etməyi sevməyən sənətkarın əsas məqsədi səhnəyə və ya ağ-qara ekranlara çıxaraq tamaşaçısını gündəlik qayğılarından uzaqlaşdırsın, onun simasına təbəssüm qondursun. Və bunu da çox yaxşı bacarırdı. Çünki, sənətkar  ilk növbədə komik xarakter aktyoru idi və buna görə də komizmi zahiri əlamətlərdə deyil, daxili varlığında canlandırmağa üstünlük verirdi. O, “Ömrün səhifələri”, “Alma almaya bənzər”, “Xoşbəxtlik qayğıları”, “Qərib cinlər diyarında”, “Şir evdən getdi”, “Yol əhvalatı”, “Qatarda”, “Bəyin oğurlanması”, “Qəm pəncərəsi”, “Yaşıl eynəkli adam”, “Güllələnmə təxirə salınır!...” və digər film, televiziya tamaşalarında yaddaqalan epizod surətlərə çəkilib. Respublikasının Əməkdar Artisti Əsgər Məmmədoğlu yaradıcılığı boyu sələflərinin ən gözəl xüsusiyyətlərini istedadının süzgəcindən keçirərək ona öz dəst-xəttini əlavə edib. Aktyor milli teatr və kino tarximizdə bənzərsiz obrazları ilə bu gün də güldürür, düşündürür, sevindirir və sevgi ilə xatırlanır.