Ölkəmizdə qastronomiya turizminin inkişafı üçün “Milli dadlar” konsepsiyasının hazırlanması işinə başlanılıb. Dövlət Turizm Agentliyinin dəstəyi ilə reallaşacaq layihənin əsas məqsədi milli mətbəx nümunələrini, onların hazırlanma və təqdim edilmə ənənələrini yerli və əcnəbi turistlər arasında populyarlaşdırmaqdır.

Azərbaycan Turizm Bürosu unudulmuş və ya unudulmaq təhlükəsi olan milli mətbəximizə məxsus nümunələrin vahid mənbədə toplanmasına dəstək olaraq “millidadlar.az” portalını təqdim edib. Layihə çərçivəsində ölkəmizin zəngin kulinariya potensialının dərin etnoqrafik köklərə malik olması nəzərə alınaraq, müxtəlif bölgələrimizin mətbəxinə məxsus nümunələr haqqında məlumatlar toplanılıb. Elmi materiallardan və birbaşa yerli əhalidən əldə olunan informasiyalar əsasında Azərbaycan üzrə 900 ədəd nümunə pasportun işlənib hazırlanması nəzərdə tutulur.