İçərişəhərdə «Divarda İncəsənət» sərgisi açılıb. Sərgi açıq məkanda nümayiş olunur. «Divarda İncəsənət» rəqəmsal layihəsi COVİD-19 pandemyasında İçərişəhərin divarlarını susmağa qoymur. «Sevgimiz elə bu qədərmiş» adlı sərgi bu qədim məkanda çəkilən məşhur klassik Azərbaycan kino incilərinə ehtiram nümunəsidir. Ta(r)dino 6 İncəsənət Platformasının həyata keçirdiyi «Divarda İncəsənət» layihəsi müasir rəssamlığı daha geniş auditoriyaya çatdırmaq niyyətindədr.

Bilməzdik ki, dünya COVİD-19 pandemiyasından bu qədər əziyyət çəkəcək. Hər kəs virusdan qorunmaq üçün uzun müddət öz içəri şəhərinə sığınacaq. Amma bu baş verdi.

«Divarda İncəsənət» sərgisində əsərləri nümayiş olunan ilk rəssam isə Orxan Hüseynovdur. Rəssam klassik Azərbaycan filmlərinin adlarına ikinci məna gətirir. O, «Bu gün də belə keçdi» deyir. Rəssamın yozumunda filmin qəhrəmanları Əsmər və Oqtay İçərişəhərin dar küçələrini maska taxaraq gəzir. Üzeyir bəyin qəhrəmanı Sərvər Gülnaza o maskanı deyil, bu maskanı taxmağı məsləhət görür. Orxan Hüseynov sərgisinə «Sevgimiz elə bu qədərmiş» söyləyir. - «Ağlıma birinci gələn kəlmə idi. mahnıdan gələn kəlmədir. İstifadə elədim… Burda iki film istifadə olunub. «O olmasın, bu olsun», bir də «Gün keçdi» onlara aid bir illüstrasiya elədim… Hər ikisi də sevgi haqqındadır. Ancaq pandemiya dövründə hər sevgiyə problemlər var». 

«Divarda İncəsənət» layihəsi İçərişəhər Dövlət Tarix-Memarlıq Qoruğu İdarəsi ilə birgə təşkil olunub və Almaniyanın Bakıdakı Səfirliyi tərəfindən dəstəklənir:

Andreas Hohlt - Almaniyanın Azərbaycandakı Səfirliyinin birinci katibi - «Bu il pandemiyaya görə çox çətin oldu. Xüsusən də incəsənət bu dönəmdə daha çox əziyyət çəkdi. İncəsənət nümayiş, təqdimat tələb edir. Bu səbəbdən çoxlu layihələr təxirə salındı.  Bu layihənin açıq havada keçirilməsi ona görə təqdirəlayiqdir ki, tamaşaçı qalereyaya getmir, qalereya özü tamaşaçıya sarı gəlir».

Yolunuz İçərişəhərə düşərsə, Kiçik Qala küçəsi 58 ünvanına yaxınlaşıb, binanın fasadında nümayiş olunan əsərə baxa bilərsiniz. «Sevgimiz elə bu qədərmiş» sərgisi fevral ayının ortalarına kimi davam edəcək.

Ülviyyə Heydərova