Koronavirus pandemiyası ilə əlaqədar tətbiq edilən karantin rejimi evdə qalmağa məcbur olan insanların gizli istedadlarını üzə çıxardığı kimi, yaradıcı insanlara da ilham mənbəyi olub. Elə türkiyəli memar-rəssam Hakan Keleş kimi...

Eskişehir Osmanqazi Universitetinin doktorantı olan Hakan Keleş bir-birindən maraqlı, qeyri-adi illüstrasiyaları ilə  sosial mediada böyük marağa səbəb olub. Türkiyənin müxtəlif şəhərlərinin, xüsusən də İstanbulun bilinən və bilinməyən küçələrinin fotosunu çəkən memar-rəssam onların üzərində öz nəhəng qəhrəmanlarını yaradır. Adi insanlar, yaxud da qəribə varlıqlara bənzəyən obrazları fotolarında gündəlik həyat tərzinə uyğun formada yerləşdirən Hakan Keleş bədii ədəbiyyatdan ilham alıb. İrlandiyalı yazıçı Conatan Sviftin “Qülliverin səyahəti” kitabındakı Liliputları və Nəhəngləri bir növ öz qəhrəmanlarına çevirib. Koronavirus pandemiyası səbəbilə tətbiq olunan sərt karantin rejimi rəssamın yaradıcılığı üçün yeni mövzu yaradıb. Belə ki, Hakan bu dəfə virusla mübarizədə gərgin əmək sərf edən insanları və  yoluxmanın qarşısını almaq üçün həyata keçirilən tədbirləri fotolarının üzərinə köçürüb. Nəticə isə böyük maraq doğurub. 2017-ci ildən fotolarla işləyən Hakan Keleşin məqsədi Türkiyənin böyük şəhərlərinin hələ də çoxlarına məlum olmayan, kəşf edilməyən küçələrini tamaşaçılara çatdırmaqdır.