“Mədəniyyət və yaradıcılıq sahəsində rəqəmsal həllər” startap müsabiqəsinin qalibləri ilə onlayn görüş keçirilib

1 Yanvar, 18:29 Sosial mediada paylaşın:

Mədəniyyət nazirinin birinci müavini, nazirin vəzifələrini müvəqqəti icra edən Anar Kərimov “Kreativ Azərbaycan” portalının (creative.az) təşkil etdiyi "Mədəniyyət və yaradıcılıq sahəsində rəqəmsal həllər” adlı startap müsabiqəsinin qalibləri ilə onlayn görüş keçirib. Qaliblər qismində “Aydın və Aydan” layihəsinin rəhbəri Rəşid Ağamalıyev, “Kreativmart” layihəsinin rəhbəri Fərrux Rəhimov və “Onlayn rəqəmsal incəsənət arxivi” layihəsinin rəhbəri, “Ta(r)dino” incəsənət platformasının təsisçisi Əsli Səmədova iştirak ediblər.

Görüşdə qalib iştirakçılar öz layihələri barədə məlumat veriblər və Azərbaycanda yaradıcı sənayelərin inkişafı və startap hərəkatının genişlənməsinə dair təkliflərini təqdim ediblər.

Anar Kərimov müsabiqə qaliblərini təbrik edib, onlarla yaradıcı sənayelər və startaplara dair fikir mübadiləsi aparıb. Bildirib ki, Mədəniyyət Nazirliyi ölkəmizdə innovativ fəaliyyətin, o cümlədən startapların dəstəklənməsinə böyük önəm verir və Nazirliyin yeni fəaliyyət strategiyasının formalaşdırılmasında bu istiqamətin əsas istiqamətlərdən biri kimi nəzərdə tutulduğunu qeyd edib. Sonda, Anar Kərimov qaliblərə layihələrin icrasında uğurlar arzulayıb.

Qeyd edək ki, Azərbaycanda mədəniyyət və yaradıcılıq sahələrində yeni ideyaları və yanaşmaları dəstəkləmək məqsədilə Mədəniyyət Nazirliyinin "Kreativ Azərbaycan" portalı 2020-ci il aprelin 10-da "Mədəniyyət və yaradıcılıq sahəsində rəqəmsal həllər” adlı startap müsabiqəsinə start verib. Layihələrin qəbulu 2020-ci il mayın 15-dək davam edib və müsabiqəyə 50-yə yaxın layihə təqdim olunub. Bu layihələr sırasından ən uğurlu hesab edilən 7 layihə ikinci, yəni 2020-ci il avqustun 23-dən etibarən başlayan video-pitçinq mərhələsinə vəsiqə qazanıb. Müsabiqənin qalibləri münsiflər heyətinin səsverməsi əsasında müəyyən olunmuş və dekabrın 8-də elan edilib.

Layihənin ümumi mükafat fondu 12000 manat təşkil edib.

CANLI YAYIM