“Dünyamızı qoruyaq: Türk dünyasının adət-ənənələri” adlı onlayn rəsm müsabiqəsi başa çatıb. Yarış Beynəlxalq Türk Mədəniyyəti və İrsi Fondunun təşkilatçılığı ilə “İrsimiz”, “Dədə Qorqud”, “Adət-ənənələr”, “Dünyamızı qoruyaq”, “Musiqi”, “Novruz”, “Səmazənlər”, “Milli Mətbəx”, “Xalçalar”, “Türk dünyasının qadınları”, “Oyunlar”, “Türk Birliyi” mövzusunda 12 kateqoriya üzrə keçirilib.

Layihə çərçivəsində Fonda üzv və müşahidəçi ölkələrdən, o cümlədən Azərbaycan, Qazaxıstan, Qırğızıstan, Türkiyə, Özbəkistan və digər dövlətlərdən 700-ə yaxın rəsm əsəri təqdim edilib. Göndərilən əsərlər onlayn səsvermə yolu ilə seçilərək, beynəlxalq münsiflər heyəti tərəfindən dəyərləndirilib. Müxtəlif yaş kateqoriyası üzrə qaliblər “Birlik, “Sülh”, “Bilik”, “Dostluq” nominasiyaları və QRAN-PRİ mükafatına layiq görülüblər. QRAN-PRİ mükafatı ilə Azərbaycandan Məryəm Quluzadə, Türkiyədən isə Elif Bilge Zengin təltif edilib. Təqdim olunan bütün rəsmlər və təsvir mətnləri əsasında Fond tərəfindən illüstrasiyalı kitab nəşr olunacaq. Burada türk dünyasının adət-ənənələrinin, mədəni- irsinin zənginliyi bir daha münayiş etdiriləcək.