Estoniyada Zəfər bayramına və Dünya Azərbaycanlılarının Həmrəyliyi Gününə həsr olunmuş konsert təşkil edilib

28 Dekabr, 16:05 Sosial mediada paylaşın:

Estoniyanın paytaxtı Tallində Azərbaycan və Belarus cəmiyyətlərinin birgə əməkdaşlığı ilə Azərbaycan xalqının Zəfər bayramına və Həmrəylik Gününə həsr edilmiş “Dostluq və Həmrəylik konserti” təşkil edilib.

Dekabrın 27-də Azərbaycanın Zəfər bayramına və Həmrəylik gününə həsr olunan “Dostluq və Həmrəylik” adlı konsert keçirilib. Tədbir Estoniyadakı Azərbaycan evinin və Belarus cəmiyyətinin təşkilatçılığı ilə Tallin şəhərinin tarixi memarlıq abidəsi sayılan Kadriorq sarayında keçirilib. Tədbirdə Azərbaycan və Belarus respublikalarının Estoniyadakı səfirliklərinin, Estoniya Mədəniyyət Nazirliyinin, İnteqrasiya Fondunun rəsmiləri, milli azlıqların nümayəndələri və bir sıra kütləvi informasiya vasitələrinin nümayəndələri iştirak ediblər.

İki saatdan çox davam edən tədbirin səhnəsində  Estoniya Opera və Balet Teatrının solisti Olqa Zaitseva, gənc eston musiqiçisi, Stokholm Royal Opera və Balet Teatrının solisti Dara Savinova və piano ifaçısı Aleksandr Jankevits çıxış edib. İfaçılar Dünya Azərbaycanlılarının Həmrəylik Gününə hədiyyə olaraq Azərbaycan dilində də musiqi ifa ediblər... Tədbirdə Azərbaycanın tarixi ərazilərinin işğaldan azad edilməsi ilə bağlı təbrik çıxışları, Azərbaycan və Belarus cəmiyyətlərinin birlik və həmrəylik çağırışları səsləndirilib. Konsertin sonunda iştirakçılara və qonaqlara Azərbaycan Evi tərəfindən hədiyyələr təqdim edilib...

CANLI YAYIM