Xalq rəssamı Ömər Eldarov - Ömrün daş yaddaşı

21 Dekabr, 22:30 Sosial mediada paylaşın:

Xalq rəssamı Ömər Eldarov… Daşların, qranitlərin ən yaxın dostu, sirdaşıdır. Onun tişəsindən çıxan heykəllər, abidələr Azərbaycan memarlıq sənətinin vizit kartına çevrilib. Əməkdaşımız Ülviyyə Heydərovanın  sənətkarla söhbət edib.

Ömər Eldarov Bakı Rəssamlıq Studiyasında ona ilk dəfə heykəltəraşlıqdan dərs keçən Anna İvanovnanı xatırlayır. Müəllimənin sözləri altı yaşlı Öməri elə həvəsləndirir ki, rəssam gələcəyini yağlı boyalara, kətan parçalara bağlamır. O, daşla, qranitlə dostluq etməyə başlayır. Arzularını həyata keçirmək üçün qaya parçalarını dilə tutur. Özü də təkcə Bakıda deyil,  Sevastopolda, Düşənbədədə, Qarsda, Ankarada özünün daş imzasını atır.    

Ömər Eldarov Məhəmməd Füzuli, Xurşidbanu Natəvan, Üzeyir Hacıbəyli, Vaqif Mustafazadə, Niyazi, Fikrət Əmirov, Hüseyn Cavid, Heydər Əliyev, Zərifə Əliyeva və neçə-neçə əbədiyyətə qovuşmuş görkəmli şəxsiyyətlərə daş ömrü bağışlayıb. Məhz onun tişəsindən çıxan heykəllər təkcə Bakının deyil, elə Azərbaycan memarlıq sənətinin vizit kartıdır. Heykəltəraşa «Hər gün şəhərdə heykəllərinizi görmək necə hissdir?» sualını verdik. Cavab verdi ki: «Öyrəşmişəm… Mən necə deyim, sakit keçirəm. Amma birinci heykəl olanda mən gəlirdim, bu heykələ baxırdım, qulaq asırdım görüm nə deyirlər..» 

O, işinə o qədər bağladır ki, ömrünün bu yaşında belə gecə-gündüz eskizləri, layihələri üzərində çalışır. Hazırda onun ən böyük arzusu müğənni - bəstəkar Müslüm Maqomayevin Bakıda ucaldılacaq heykəlini tamamlamaqdır.

Müslüm Maqomayev səsini Xəzərin dənizinə bağışladısa, Ömər Eldarov da Müslüm Maqomayevin heykəlini Xəzərin qoynuna həvalə etmək niyyətindədir. Ömər Eldarovdan "Gənc heykəltəraşlara nə məsləhət görərdiniz?" soruşduq: «Ən vacibi səmimiyyət. Səmimi olsunlar. Biganəliklə işləmək olmaz. Nə qədər səmimi olsalar işləri də bi o qədər gözəl alınar», dedi.

 

Ülviyyə Heydərova

CANLI YAYIM