16 dekabr Milli Qəhrəman Salatın Əsgərovanın doğum günüdür

16 Dekabr, 20:48 Sosial mediada paylaşın:

 Bu gün adını tarixə qanı ilə yazdıran, Azərbaycanın Milli Qəhrəmanı Salatın Əsgərovanın doğum günüdür.

"Mən getməsəm, kim gedəcək?" - cəbhə bölgəsinə getmək fikrindən daşındırmaq istəyənlərə, Salatın Əsgərova məhz belə cavab verirdi. Axı Salatın, Əsgərova soyadını sadəcə daşımırdı, o, özünü elə əsgər hesab edirdi - informasiya savaşının əsgəri. Jurnalist Vətənini xəbərlə, reportajla müdafiə etmək üçün zehnindən, təcrübəsindən istehkam qurmadı. Salatın Əsgərova Ermənistan-Azərbaycan, Dağlıq Qarabağ münaqişəsi, erməni terrorizmi haqqında həqiqətləri beynəlxalq ictimaiyyətə çatdırmaq üçün döyüş bölgələrinə yollandı, qaynar nöqtələrdə baş verən hadisələri gözüylə görüb, qələmə aldı.

Salatın Əsgərovanın getdiyi yolun sonundan xəbəri olsa da fikrindən dönmür. 1991-ci ilin yanvarın 8-dən 9-na keçən gecə Bakıdan Şuşaya batalyon komandiri, podpolkovnik Oleq Larionovun yanına getmək üçün hərbi formasını geyinib yola düşür. Yevlax-Laçın yolunun 141-ci kilometrliyində Qaladərəsi kəndi yaxınlığında içində Salatın Əsgərovanın da olduğu hərbi maşın pusquda durmuş erməni terrorçuları tərəfindən atəşə tutulur. Hərbçilərlə yanaşı, Salatın Əsgərova da vəhşicəsinə qətlə yetirilir. İlk şəhid qadın jurnalistin qətlə yetirildiyi kəndə sonradan onun adı verildi - Salatınkənd.

 

Ülviyyə Heydərova

CANLI YAYIM