Uzun illərdir, erməni abidəsi kimi dünyaya təqdim edilən, Kəlbəcərdə yerləşən Xudavəng monastırının talan edilərək kompleksə məxsus olan xaçlar, zənglər və digər elementlərin qanunsuz olaraq Ermənistana daşıması haqqında məlumat vermişdik. Bəli, bu fakt artıq, necə deyərlər, öz təsdiqini tapıb. Belə ki, Ermənistan mediasında  “Dadivankdan Yerevana” adlı satış-sərgisinin  keçirilməsi ilə bağlı məlumat yerləşdirlib. Bununla əlaqədar olaraq Mədəniyyət Nazirliyi Bəyanat yayıb.

İşğal olunmuş torpaqlarımızda qədim məbəd və məscidlərlə bərabər, Azərbaycanın xristian memarlığını əks etdirən ehtişamlı monastırlar da var. Belə məbədlərdən biri də Kəlbəcərdə yerləşən Xudavəng monastırıdır. Kəlbəcərdə - yüksək təpəlik üzərində, əsrarəngiz təbiət qoynunda inşa edilmiş Xudavəng monastrı Azrəbaycan ərazisindəki ən böyük monastr kompleksidir. Alban memarlığının ən gözəl nümunələrindən olan Xudavəng monastırının vəziyyəti hazırda ürək ağrıdıcıdır. Dini abidə dağıdılmasa da, tamamilə qriqoryanlaşdırılıb. Ermənistanın işğalçı hərbi birləşmələri Kəlbəcər rayonunu tərk edərkən Xudavəng monastır kompleksini talan edilərək kompleksə məxsus olan xaçların, zənglərin və digər elementlərin Ermənistana daşındığı barədə məlumatlar yayılmışdı. Elə bu günlərdə Ermənistan mediasında yer alan xəbərlər də  bunu təsdiq edir. Bildirilir ki, dekabrın 16-da Ermənistan paytaxtındakı Xalq Sənətləri Muzeyində “Dadivankdan Yerevana” adlı satış-sərgi keçiriləcək. Sərgidə Dadivank - yəni, Xudavəng monastır kompleksindən gətirilmiş Bibliya, xaçlar, ikonalar, suvenirlər, kitablar, fotoalbomlar nümayiş olunacaq. Həmçinin, Dağlıq Qarabağ ermənilərinə yardım məqsədilə kulinariya və şirniyyat məhsullarının satışı təşkil olunacaq. Bunla bağlı Mədəniyyət Nazirliyi Bəyanat yayıb.  Bəyanatda bildirlir ki, UNESCO-nun 1970-ci il Konvensiyası mədəniyyət sərvətlərinin qanunsuz olaraq gətirilməsinin, çıxarılmasının və onların üzərində mülkiyyət hüququnun başqasına verilməsinin qadağan edilməsinə və qarşısının alınmasına yönəldilmiş tədbirləri, eləcədə 1954-cü il Haaqada qəbul edilən “Silahlı münaqişələr zamanı mədəni abidələrin qorunmasına dair Konvensiya”sı işğalçının üzərinə işğal edilmiş ərazilərdə mülkiyyətin oğurlanmasının qarşısının alınması istiqamətində addımlar atma öhdəliyi qoyur. Xüsusilə Ermənistanın Azərbaycan torpaqlarını işğalı kontekstində Haaqa Konvensiyasının İkinci Protokolunun 9-cu bəndi işğalda iştirak edən tərəfin “işğal edilmiş ərazilərə münasibətdə” mədəni mülkiyyətin qanunsuz ticarəti, bu ərazilərdən çıxarılması, abidələrin mədəni, tarixi və ya elmi sübut xüsusiyyətinin dəyişdirilməsi və ya dağıdılmasının qadağan etməsi və qarşısının almasını təsbit edir.

Vurğulanır ki, Mədəniyyət Nazirliyi tərəfindən bu məsələ ciddi nəzarətdə saxlanılır, Ermənistan tərəfinin qeyri-qanuni fəaliyyətləri barədə beynəlxalq təşkilatlar mütəmadi olaraq məlumatlandırılır və bu kimi mənimsəmə faktları ilə bağlı zəruri hüquqi proseduraların tətbiqi üçün tədbirlər görüləcək. Eyni zamanda, beynəlxalq təşkilatları, xüsusilə, UNESCO-nu bu faktlara hüquqi qiymət verməyə və Ermənistanın Azərbaycan ərazisindəki tarixi-mədəni irsə qarşı törətdiyi müharibə cinayətlərini araşdırmağa çağırırıq.