“Şuşa Azərbaycan mədəniyyətinin beşiyidir”. Bu sərlövhəli məqalə rus dilində Özbəkistanın “ishonch.uz” portalında yerləşdirilib.

Yazıda bildirilir ki, Şuşa Azərbaycan milli musiqisinin və poeziyasının beşiyi, qədim tarixi abidədir. Şuşa qalası müdafiə məqsədilə yaradılıb. 1747-ci ildə Qarabağ xanlığının əsasını qoyan Pənahəli xan öz xanlığını yadellilərin hücumlarından qorumaq məqsədilə 1752-ci ildə Şuşa qalasının tikilməsinə göstəriş verir. O dövrdə “Pənahabadi” adlı gümüş sikkə də döyülür. Qeyd olunur ki, 1823-cü ildə Şuşa Qarabağ xanlığının mərkəzinə çevrilib, “Qafqazın konservatoriyası”, “Qafqazın sənət məbədi”, “Azərbaycan musiqisinin beşiyi” də adlandırılıb. Vurğulanır ki, noyabrın 8-i Azərbaycan üçün əlamətdar bir gündür. Bu gün Azərbaycan Şuşanı erməni işğalından qaytararaq tarixi qələbə qazanıb, ərazi bütövlüyünü bərpa edib.