"Mədəniyyət" kanalı fəaliyyəti ərzində təkcə Azərbaycanın deyil, eləcə də müxtəlif ölkələrin mədəniyyətini təbliğ edir, rəngarəng verilişlər yayımlayır. Bu ölkələr sırasında olan Macarıstan da telekanal rəhbərliyini diqqətdən kənar qoymayıb. Bu gün "Mədəniyyət" kanalının direktoru, Əməkdar artist Ramil Qasımov Macarıstanın “Qızıl Ləyaqət Xaçı” ilə təltif olunub.

Macarıstanın Azərbaycandakı səfirliyində Mədəniyyət TV-nin direktoru, Əməkdar artist Ramil Qasımova xüsusi mükafat verilib. Təltifetmə mərasimində çıxış edən Macarıstanın Azərbaycandakı səfiri Viktor Sederkenyi iki ölkə arasındakı münasibətlərin, sıx əməkdaşlığın mədəni inkişafa verdiyi töhfələr barədə danışıb. Mədəniyyət telekanalının macar ədəbiyyatı, musiqisi, incəsənətinin Azərbaycan ictimaiyyətinə çatdırılmasında böyük rol oynadığını bildirib. Qeyd edib ki, bu məqsədlə Macarıstan prezidenti Janos Ader macar mədəniyyətinin Azərbaycanda populyarlaşmasında müstəsna rolunu qiymətləndirərək, Mədəniyyət TV-nin direktoru Ramil Qasımova Macarıstanın “Qızıl Ləyaqət Xaçı”nın təqdim edilməsi barədə qətnamə imzalayıb. Qətnaməni oxuyan və mükafatı təqdim edən səfir kanalın direktoruna fəaliyyəti ilə ölkələrimizi, millətlərimizi və mədəniyyətimizi daha da yaxınlaşdırdığı üçün dərin minnətdarlığını bildirib. Əməkdar artist, Opera və Balet Teatrının solisti Ramil Qasımov da, öz növbəsində, Macarıstan Prezidenti cənab Janos Aderə, həmçinin mükafatı təqdim edən  səfir Viktor Sederkenyiyə Mədəniyyət TV-yə və onun işinə göstərilən etimada görə təşəkkür edib.

Fotolar Rüstəm İsmayılovundur