İspaniyanın Bilbao şəhərində məşhur modernist rəssam Vasili Kandinskinin sərgisi açılacaq. Virtual ekspozisiyada fırça ustasının 60-dan çox əsəri nümayiş olunacaq.

İspan şəhəri Bilbaoda yerləşən Quqqenheym muzeyi tanınmış mesenatın zəngin kolleksiyasını ehtiva edir. Memarı Frenk Qeri olan muzeydə bu dəfə məşhur modernist rəssam Vasili Kandinskinin sərgisi açılacaq. Kandinskinin yaradıcılığına böyük qiymət verən Solomon Quqqenheym onu usta rəssamlardan olan Brak və Mondriandan da üstün tuturdu. Quqqenheymə görə, müasir təsviri sənətdə yeni cığır açan da məhz Kandinski olub. Yaradıcılığında forma və fəzanın qarşılıqlı əlaqəsini yaradan, rəngləri fikrinin ifadə vasitəsi seçən Vasili Kandinski “abstrtakt incəsənətin atası” hesab edilir. Vaxtilə Quqqenheym şəxsi kolleksiyası üçün rəssamın 100-dən çox əsərini əldə edib. Bilbaoda yerləşən muzeyin salonlarında bu kolleksiyaya daxil olan 60-a yaxın tablo nümayiş olunacaq. Lakin pandemiya səbəbilə, ekspozisiyanın virtual formada keçirilməsi nəzərdə tutulub. Sənətsevərlər virtual sərgidə Kandinskinin məşhur əsərlərinə detallı şəkildə tamaşa etmək imkanı qazanacaqlar. Bunun üçün Muzeyin rəsmi sosial şəbəkə hesablarına müraciət etmək kifayətdir.