Azərbaycan əsilli tanınmış fotojurnalist Rza Diqqəti  sentyabrın 27-dən başlayan Qarabağ müharibəsini işıqlandırmaq üçün ölkəmizə gəlib. İşğaldan azad olunmuş əraziləri gəzən, gördüyü haqsızlıqları fotokameranın yaddaşına köçürən Rza Diqqəti media nümayəndələri ilə təəssüratlarını bölüşüb.

Fotoları “National Geographic”,  “Time photo” kimi tanınmış mətbuat orqanlarının üz qabığlarını bəzəyən Rza Diqqəti müasir dövrün ən yaxşı fotoreportyorlarından biridir. Bir milyondan çox fotonun müəllifi olan Rza Diqqəti Azərbaycanın başına gələn faciələri də fotolentin yaddaşına həkk edib. 90-cı illər Qarabağ müharibəsi dövründə döyüş gedən bölgələrdə - Şuşa, Zəngilan və Cəbrayılda baş verən hadisələri, eləcə də, Azərbaycan həqiqətlətini obyektivin gözü ilə dünya ictimaiyyətinin diqqətinə çatdırıb. Rza Diqqəti 2020-ci il 27 sentyabrdan başlayan Qarabağ müharibəsini işıqlandımaq üçün də Azərbaycana gəlib. Müzəffər ordumuzun işğaldan azad etdiyi ərazilərdə olan fotoreportyor həmin yerlərin fotolarını çəkərək Qarabağ həqiqətlərini bütün dünyaya çatdırmağa çalışır.

"Ağdam Azərbaycanın Hirosimasıdır", deyir Rza Diqqəti.

Artıq işğaldan azad olunmuş Füzulini, Şuşanı, Ağdamı gəzən fotojurnalist 90-cı illərdə şahidi olduqları ilə bugünki vəziyyəti dəyərlərndirdi. 30 il əvvəlki görüntülərin lentə alındığı məkanlara yenidən ayaq basan Rza Diqqəti ən yaddaqalan, ən təsirli fotosunun Xocalıdan olan qadının fotosu olduğunu deyir.

Amansızcasına öldürülən, işgəncələrə məruz qalan insanlarımızın əzablarına şahid olmuş Rza Diqqəti indi azad vətən torpağının fotolarını lentə alır. Növbəti səfərində isə müsahibimizin qalereyasını yeni həyat qazanan Qarabağın fotolarının bəzəyəcəyinə əminik...

Xavər Zairova