Torpaqlarımız alındıqca qələbə sevincimiz də artır. Tanınmış insanlar da istisna deyil. Ələlxüsus da, o torpaqlarda doğulan, böyüyən, yaşayan insanlar... Onlar üçün bu qələbənin əhəmiyyəti tam başqadır...

Xalq artisti Firəngiz Mütəllimova deyir ki:

 - "Açığı, mən Şuşa üçün çox narahat idim. Çünki bilirdim, Şuşa dağın başındadır və ora çıxmaq çox çətindir, onlar hər yeri minalamışdılar. Amma halal olsun ordumuza, canlarını, qanlarını verdilər. Kişi kimi döyüşüb qanları bahasına aldılar Şuşanı".

Onunla ilk görüşümüz müharibə vaxtına təsadüf etdi. O vaxt hələ ordumuz torpaqlarımızın bir hissəsini düşməndən azad edirdi.  Bu gün isə Şuşa azaddır və biz Firəngiz xanımla yenidən görüşdük ki, həsrətini paylaşdığımız kimi, sevincinə də şərik olaq.

 - "Necə olaram?.. Oturdum ağladım, güldüm, ağladım, güldüm. Yarım saat oturb qaldım mətbəxdə. Dedim ata, ana, ruhunuz şad olsun. Bax, bizim uçan evimizin içində ot, böyürtkan, ağac bitib. Bunlar belə yerdə necə yaşaya bilirlər?.."

Şuşanı heç vaxt görməsə də, anasının danışdıqlarından Şuşanı əzbər tanıyan gənc istedadımız Gülarə Məmmədova da çox sevinclidir. Əvvəla, ona görə ki, o, Şuşa Dövlət Musiqili Dram Teatrının aktrisasıdır. İndi Gülarə Şuşada səhnəyə çıxacağı günü həyacanla gözləyir.

 - "Hamımız sevinirik ki, Şuşaya qayıdacağıq, orada tamaşa oynayacağıq... İnaşallah ki, orada yeni tamaşalar quracağıq", - deyir Şuşa Dövlət Musiqili Dram Teatrının gənc aktrisası Gülarə Məmmədova.

Gülarənin istedadı tək aktrisalıqla bitmir. O, həm də, peşəkar rəssamdan heç də geri qalmayacaq dərəcədə gözəl rəsmlər çəkir. Özü də söylədiyi kimi, heç bir rəssamlıq təhsili olmadan. Özü isə, rəssamlığa olan həvəsi barədə belə deyir:

 - "Çətin sənətdir. Elə şeylər var ki, məsələn, kölgə effekti vermək üçün gərək peşəkardan öyrənəsən... Amma, istedad da elə bir şeydir ki, o, varsa, sən özün öz üzərində onu təkmilləşdirə bilərsən".

Teatrdan, sənətdən danışmışkən, yolumuzu Şuşa Dövlət Musiqili Dram Teatrından saldıq. Teatrın direktoru, Əməkdar artist  Yadigar Muradov da çox xoşbəxtdir. 1980-ci illərdə Agdamdan Şuşaya köç edən Yadigar müəllim, indi Bakıdan Şuşaya köç etməyi səbirsizliklə gözləyir:

 - "Şuşada teatr mühiti həmişə olub. Düzdür, dövlət statusu olmasa da, həmişə yerli həvəskarların köməyi ilə komediya, faciə janrında yerli müəlliflərin əsərləri tamaşaya qoyulub" - deyir, Şuşa Dövlət Musiqili Dram Teatrın direktoru, Əməkdar artist Yadigar Muradov.

Gələcək repertuardan da danışan Yadigar müəllim bildirir ki: - "Qələbə ruhlu tamaşalarımız çox olsa da, vaxtilə başımıza gətirilən müsibətləri əks etdirən, işğala həsr olunmuş tamaşalar da repertuardan çıxarılmayacaq. Şuşaya qayıdanda “Pənahəli xan” tamaşasının məşqləri ilə işimizə başlayacağıq. Teatrın binasının bir tərəfində Üzeyir bəyin, digər tərəfində isə Bülbülün heykəlləri var idi. Onları dağıdıb, park salıblar binamızın yerində. Ancaq, mən demişəm, mənim orada evim var, teatr hazır olana qədər məşqlərimizi orada edərik".

Görünən odur ki, mədəniyyətin beşiyi olan Şuşa əsl mədəniyyət ocağına çevriləcək. Eynilə ötən əsrdə olduğu kimi: yurdumuzun istedadlı insanları Şuşanı mədəniyyət şəhəri kimi bəzəyəcək.

Gülnar İlqarqızı