"Qarabağ - mədəniyyətimizin beşiyi": Pənahəli xanın imarəti

27 Noyabr, 14:57 Sosial mediada paylaşın:

Mədəniyyət Nazirliyi tərəfindən həyata keçirilən “Qarabağ - mədəniyyətimizin beşiyi” adlı layihə davam edir. Layihə çərçivəsində növbəti material Pənahəli xanın Ağdamdakı imarətinə həsr olunub.

Mədəniyyət Nazirliyinin həyata keçirdiyi «Qarabağ - mədəniyyətimizin beşiyi» layihəsi «Pənahəli xanın imarətinə» həsr edilib. Adından da göründüyü kimi, bu tarix-memarlıq abidəsi birinci Qarabağ xanı Pənahəli xana məxsus olub. Pənahəli xan 1738-ci ildə Xorasandan - Nadir şahın xidmətindən uzaqlaşandan sonra Qarabağ xanlığını quran dövrdə məhz ağ daşdan bu yay imarətini inşa etdirib. Şəhərin sonradan «Ağdam» adlandırılmasının əsas səbəbi də elə Pəhanəli xanın ağ daşdan tikdirdiyi bu saray olub.

Saray kompleksi XVIII əsrdən 1993-cü ilə kimi qorunub saxlanılırdı. Erməni silahlı qüvvələri «Pənahəli xanın imarətinin» yerləşdiyi Ağdamı «Ruhlar şəhərin»ə, «Qafqazın Xirosiması»na çevirdi. Nəinki Ağdamdan, «Pənahəli xanın imarəti»ndən belə bir daş salamat qalmayıb. Tarix görən «Pənahəli xanın imarəti» indi fotolarda, kinolentlərdə, xatirələrdədir. Bu memarlıq abidəsinə bir də virtual Ağdamdan baxmaq mümkündür.

Ağdam şəhəri noyabrın 20-dən azaddır. Heç şübhəsiz, şəhər əvvəlki görkəmini alacaq. Amma «Pənahəli xanın imarəti» yenə fotolardan, xatirələrdən boylanacaq.

 

Ülviyyə Heydərova

CANLI YAYIM