Musiqi dünyasının ən nüfuzlu mükafatı olan “Qremmi”nin təqdimedilmə tarixi müəyyənləşib. Bu il əsas mükafatlara  namizədlər arasında məşhur müğənnilər Beyonse,  Dua Lipa, Teylor Svift də var.

ABŞ-ın Milli Səsyazma Akademiyası 2021-ci il üçün  “Qremmi” mükafatına namizədlərin adlarını açıqlayıb. Musiqi dünyasının “Oskarına” 9 kateqoriyada namizdə seçilən məşhur müğənni Beyonse rəqiblərini geridə qoyub. Müğənni “Black parade” mahnısı ilə  “İlin ən yaxşı səsyazması” mükafatını almağa iddialıdır.

Namizədlik sayına görə Beyonseni britaniyalı müğənni Dua Lipa izləyir.  İki il əvvəl “İlin yeni ifaçısı” mükafatını qazanmış 25 yaşlı ulduz bu dəfə 6 Qremmi uğrunda mübarizə aparacaq. Onun “Future Nostalgia” adlı toplusu “İlin albomu” kateqoriyasında “Qızıl qramafon”a namizəddir.

Dua Lipanın əsas rəqiblərindən biri isə kantri-pop ifaçısı Teylor Sviftdir.  Müğənninin  özünütəcrid zamanı hazırladığı  “Folklore” albomu ən çox dinlənmə sayına görə “Ginnesin rekordlar kitabı”na da düşüb. Sviftin yeni təqdim olunan “Cardigan” klipi də  mükafatın “İlin mahnısı” siyahısına daxil edilib.

Amerikalı repçi Roddi Diç də Teylor Svift kimi 6 Qremmi üçün namizəd seçilib.  Onun “The Box” kompozisiyası “İlin mahnısı”, “Rockstar” sinqlı isə  “İlin səsyazması” makafaını ala bilər.

63-cü Qremmi mükafatlandırma mərasiminin yanvarın 31-də keçiriləcəyi nəzərdə tutulub.

Xavər Zairova