Görkəmli kino rejissoru, ssenarist, Xalq artisti Vaqif Mustafayevin Xocalı faciəsindən bəhs edən “Dərdimi çəkirəm” filmi 16-cı Tehran Beynəlxalq Film Festivalının əsas müsabiqəsində iştirak edir.

Şanlı Ordumuzun ilk hərbi operatoru Seyidağa Mövsümov.... O, Xocalı faciəsini lentə alan, Xocalı dərdini tarixə köçürən operatorlardan olub. Görkəmli kino rejissoru, Xalq artisti Vaqif Mustafayev Xocalı dərdini məhz Seyidağa Mövsümovun xatirəsi ilə çəkdi.

Rejissor Vaqif Mustafayev söyləyir ki, bu ekran əsərini ərsəyə gətirmək, dünyaya çıxartmaqdan daha asan idi. Səbəb? Çünki, bu erməni lobbisi, ermənilərin apardıqları bu murdar, ideoloji müharibə və onların lobbiçiliyi imkan vermirdi ki, heç bir həqiqəti əsər şəklində çıxarasan harasa və nəhayət bu baş verdi.

“Dərdimi çəkirəm” artıq sərhədləri aşdı. “Resistance” Beynəlxalq Film Festivalı İranın ən nüfuzlu beynəlxalq festivallarından biri hesab olunur. 16-cı Tehran Beynəlxalq Film Festivalına bu il 3700-dən çox müxtəlif janrda film təqdim olunub. Vaqif Mustafayevin “Dərdimi çəkirəm” filmi də daxil olmaqla yalnız 145 ekran əsəri festivalda iştirak hüququ qazanıb. Festivalda əsasən İran, Hindistan, ABŞ, Türkiyə, Braziliya, İspaniya, İngiltərə, İtaliya, Fransa, Argentina, Meksika, Rusiya, İndoneziya, Azərbaycan, Gürcüstan, Yaponiya və digər ölkələrin filmləri nümayiş etdirilir.

“Özü də bu məlumatı mənə Hollivuddan zəng gedib dedilər. Və sizin filminiz ordadır. Biz bu filmi bəyan etmişdik bir çox festivala, amma bunun İranda Tehran Festivalına düşməsinə mən çox sevindim. Ona görə yox ki, mən istyəyirəm mükafat. Mükafat mənim üçün ikinci, onuncu dərəcəlidir. Əsas odur ki, deməli, dünyadan ora yığılan, gələn, iştirak edən insanlar buna baxacaq və bu filmi daha geniş yaya biləcəyik”, deyir Xalq artisti Ramiz Mustafayev.

Ekran əsəri Heydər Əliyev Fondunun vitse-prezidenti Leyla Əliyevanın “Xocalıya ədalət!” kampaniyasına dəstək olaraq çəkilib.

Rejissor deyir ki: “Bu filmi çəkəndə də düşünürdüm və istəyirdim ki, bu film də bir ədalətə dəstək versin. Doğrudan da, Xocalıya, ədalətə dəstək versin. Amma ədaləti bizim mübariz ordumuz Ali Baş Komandanımızn rəhbərliyi altında bərpa etdi”.  

Vaqif Mustafayev I Qarabağ müharibəsi dövründə yazdığı ssenarisi ilə rejissor Ceyhun Mirzəyevlə birgə “Fəryad” qopardı. Vaqif Mustafayev bizimlə “Fəryad” filmiylə bağlı sevindirici xəbərini də bölüşdü: “İkinci Qarabağ müharibəmizdə belə möhtəşəm qələbə əldə edəndən sonra bu artıq sosial sifarişə çevrilir. Getdikcə sosial sifarişə çevrilir. Yəni sosial şəbəkələrdə də insanlar yazır ki, yaxşı olardı, “Fəryad 2“ də çəkilsin.  Xalq nə istəyir, deməli, sənətkar da bunu etməlidir”.

Ülviyyə Heydərova